އައްޑޫގައި "އެއްބުރުން" ކެމްޕޭންގެ ހަފްތާ ބަންދުގެ 19 ވަނަ ޕްރޮގްރާމް މިރޭ ފެށޭނެ ކަމަށް އައްޑޫ ސިޓީ އަށް އެމްޑީޕީން ކަނޑައަޅައިފައިވާ ކެމްޕޭން ކޯޑިނޭޓަރު ޑރ. މުސްތޮފާ ލުތުފީ ވިދާޅުވެއްޖެ އެވެ.
މިރޭ މި ފެށޭ ހަފްތާ ބަންދުގެ ހަރަކާތްތަކަކީ އާއްމުކޮށް ކޮންމެ ހަފްތާ ބަންދެއްގައި ވެސް އައްޑޫ ސިޓީގައި ކުރިޔަށް ގެންދާ ހަރަކާތްތަކުގެ 19 ވަނަ ޕްރޮގްރާމް ކަމުން، މައިގަނޑު ގޮތެއްގައި މިރޭ ފަށާ ޕްރޮގްރާމްތަކުގައި އެކުލެވިގެން ވާނީ މި ހަފްތާ އާ ހިސާބަށް ކުރިޔަށް ގެންދެވުނު "އެއްބުރުން" ކެމްޕެއިންގެ ހަރަކާތްތަކަށް ބަލާ އޭގެ އަލީގައި ކުރިޔަށް ކެމްޕެއިން ގެންދާނެ ގޮތުގެ ޕްލޭން ރޭވުމާއި މަސައްކަތް ފެށުން ކަމުގައި މުސްތޮފާ ވިދާޅުވި އެވެ.
އެގޮތުން މިރޭ ހިތަދޫ ދެކުނު ދާއިރާއިން މިހާތަނަށް ހޯދިފައިވާ މައުލޫމާތު އެއްކޮށް އޭގެ މައްޗަށް ކުރިޔަށް ހުރި މަސައްކަތްތައް ތަރުތީބު ކުރުން އޮންނާނެ ކަމަށް މުސްތޮފާ ވިދާޅުވި އެވެ.
އަދި ކުރިޔަށް މި އޮތް 3 ދުވަހުގެ ތެރޭގައި އައްޑޫ ސިޓީގެ ކޮންމެ ދާއިރާއެއްގައި ވެސް ކެމްޕެއިން މަސައްކަތްތައް ކުރިޔަށް ގެންދާ ގޮތަށް ވަނީ ރާވާފައި ކަމަށާއި، ވަކި ވަކި ދާއިރާތަކުގެ ކެމްޕެއިން ކުދި ކޮމިޓީތަކާއި، ކެމްޕެއިން އެޖެންޓުންނާ އެކު ބައްދަލުވުންތައް ބާއްވާ ގޮތަށް ވަނީ ހަމަޖެހިފަ އެވެ.
އައްޑު އަށް މިއަދު ހަވީރު އަންނަ ކެމްޕޭން ޓީމު މި ހަފްތާ ބަންދުގެ މަސައްކަތް ނިންމާ މާލެ ފުރާނީ އާދިއްތަ ދުވަހު އެވެ.