ސ. މަރަދޫފޭދޫ އެފްއެންޑްސީގެ ފަރާތުން ހިތަދޫގައި ކުލިނިކެއް ހުޅުވައި ހިދުމަތް ދޭން ފަށައިފި އެވެ.
އެފްއެންޑްސީ މެޑިކެއާގެ ނަމުގައި ކްލިނިކެއްގެ އިތުރުން ފާމަސީއެއް ހިންގަމުން އަންނަ އެފްއެންޑްސީގެ އޮފިޝަލަކު ވިދާޅުވީ ހިތަދޫ ކްލިނިކް ރަސްމީކޮށް ހުޅުވައި ހިދުމަތް ދޭން ފެށީ އަންގާރަ ދުވަހު ކަމަށެވެ.
އޭނާ ވިދާޅުވީ ހިތަދޫ ކްލިނިކް ހުޅުވާފައި ވަނީ "އެފްއެންސީ މެޑިކެއަރ އެންޑް ސްކޭން ސެންޓަރު"ގެ ނަމުގައި ކަމަށެވެ.
އޮފިޝަލް ވިދާޅުވީ މި ސެންޓަރު ހުޅުވީ ކުރިން މެޑި ކެއާރގެ ނަމުގައި ހިތަދޫ ކްލިނިކެއް ހިންގި ބެނީނާ ގޭގައިއެވެ.
އޭނާ ވިދާޅުވީ ހިތަދޫގައި ކްލިނިކެއް ހުޅުވައި ހިންގަން ފެށުމާ އެކު، މި މަހުގެ ތެރޭގައި އާސަންދައިގެ ދަށުން ހިދުމަތް ލިބޭ ފާމަސީއެއް ވެސް ހުޅުވުމަށް މަސައްކަތް ކުރަމުން އަންނަ ކަމަށެވެ.
"މަރަދޫފޭދޫގައި ހުންނަ އެފްއެންޑްސީ ކްލިނިކެކޭ އެއްގޮތަށް ހިތަދޫ ކްލިނިކަށް ވެސް ހާއްސަ ޑޮކްޓަރުންތަކެއް ވަޑައިގެން ބަލި މީހުންނަށް ފަރުވާ ދެމުން ގެންދާނެ،" އޭނާ ވިދާޅުވި އެވެ.
އޭނާ ވިދާޅުވީ ކުރިއަށް އޮތް ހަފުތާ ބަންދުގައި އެ ކްލިނިކަށް ކަށީގެ ޑޮކްޓަރެއްގެ އިތުރުން، ސްކޭން އަދި ކުޑަ ކުދިންގެ ޑޮކްޓަރަކު ވެސް ވަޑައިގެން ބަލި މީހުންނަށް ފަރުވާ ދޭނެ ކަމަށެވެ.