ސ. ހެރަތެރަ ރިސޯޓް މީގެ ކުރިން "ހަނދުފުށި" ރިސޯޓްގެ ނަމުގައި ހިންގާފައިވާ ޔޮޓް ޓުއާޒް އިން އެ ރިސޯޓް ހިންގުމަށް އަލުން ކުރިމަތިލާނެ ކަމަށް ބުނެފި އެވެ.
ޔޮޓް ޓުއާޒް އިން ބުދަ ދުވަހު ބޭއްވި ނިއުސް ކޮންފަރެންސެއްގައި އެ ކުންފުނީގެ އެގްޒެކެޓިވް ޑިރެކްޓަރު އިބްރާހީމް ރަޝީދު ވިދާޅުވީ ހެރަތެރަ މެނޭޖް ކުރުމަށް އެމްޓީޑީސީން ހުޅުވާލަފާއިވާ ފުރުސަތަށް އެކުންފުނިން ޝައުގުވެރިވާ ކަމަށެވެ. އޭނާ ވިދަޅުވީ ކުރިން ވެސް އެ ކުންފުނިން ހެރެތެރެ ހިންގަމުން ދަނިކޮށް ކުރިމަތިވި މައްސަލަތާއި ހުރެ އެ ރަށް ނެގުމުން އައްޑު ރައްޔިތުންނަށައި އެ ކުންފުންޏަށް ބޮޑު ގެއްލުމެއް ކުރިމަތިވި ކަމަށެވެ.
ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ހިއްސާ އޮންނަ ޔޮޓް ޓްއާސް އަށް ހެރެތެރެ ކުރިން ދީފައިވަނީ އަހަރަކަށް އެނދަކަށް 18،196 ޑޮލަރަށް ކުއްޔަށެވެ.
ނަމަވެސް 2008 މޭ މަހުވީ އެއްބަސް ވުމާއި އެއްގޮތަށް ޔޮޓް ޓުއާސް އިން ކުލި ނުދެއްކުމާއި ގުޅިގެން 273 އެނދުގެ ހެރަތެރަ ރިސޯޓްގެ އެއްބަސް ވުން އެމްޓީޑީސީން ބާޠިލް ކުރިއެވެ. އެހެންވެ ޔޮޓް ޓްއާސް އިން އެ މައްސަލަ ކޯޓަށް ހުށަހެޅި އެވެ. އަދި އެއްބަސްވުން ބާތިލުކުރުމުން ޔޮޓް ޓްއާސް އިން ރަށް ދޫކޮށްނުލައި ގިނަ ދުވަސްތަކެއް ވުމުން އެމްޓީޑީސީން ވެސް މައްސަލަ ކޯޓަށް ހުށަހެޅި އެވެ.
އެމްޓީޑީސީ އާއި ހެރަތެރައާ ގުޅޭ މައްސަލަތައް 2011 ވަނަ އަހަރުގެ އޮކްޓޫބަރު މަހު ކޯޓުން ބޭރުގައި ވަނީ އެމްޓީޑީސީން ޔޮޓް ޓުއާސް އަށް 3.5 މިލިއަން ޑޮލަރު ދޭގޮތަށް އެއްބަސްވެ މައްސަލަ ނިންމާފައިއެވެ.
ޔޮޓް ޓުއާސްގެ މައްސަލަ ގަޑަށް ފަހަށް އެމްޓީޑީސީގެ މެނޭޖްމަންޓްގެ ދަށުން ދުވަސްކޮޅަކަށް ހެރެތެރެ ހިންގުމަށް ފަހު 2011 ވަނަ އަހަރުގެ ކުރީކޮޅު 20 އަހަރު ދުވަހުގެ އެއްބަސްވުމެއްގެ ދަށުން، ތައިލެންޑްގެ އޮނިކްސް ހޮސްޕިޓަލިޓީ ގްރޫޕާ ހަވާލުކުރި އެވެ.
އޭގެ އަހަރެއްފަހުން އޮނިކްސް ގްރޫޕުން ހެރަތެރަ ނުހިންގިގެން ދޫކޮށްލުމާ ގުޅިގެން އަނެއްކާ ވެސް އަލުން އެމްޓީޑީސީން ރިސޯޓާ ހަވާލުވި އެވެ.
އެމްޓީޑީސީން މިހާރު ވަނީ ރިސޯޓު ހިންގާނެ ފަރާތެއް ހޯދުމަށް އިއުލާނުކޮށްފަ އެވެ. އަދި އެތައް ފަހަރެއްގެ މަތިން އިއްލާންކޮށްގެންވެސް އެތަން ހިންގާނެ ރަނަގަޅުފަރާތެއް އަދި ވަނީ ލިބޭ ގޮތް ނުވެފައިއެވެ.
ހެރަތެރަ ގަނެގެން ނުވަތަ ސަބް ލީސް އެގްރިމަންޓެއްގެ ދަށުން ހިންގާނެ ބަޔަކު ހޯދުމަށް އެމްޓީޑީސީން އެންމެ ފަހުން ދިން މުއްދަތު މި މަހުގެ 21 ގެ ނިޔަލަށް ހަމަވާނެ އެވެ.