ސ. ހިތަދޫ ދެކުނު ދާއިރާގެ ޑީއާރްޕީ އޮފީހަށް ރޭ ބަޔަކު ތާރު ޖަހައިފި އެވެ.
"ގައުމައިގެން ކުރިއަށް" ކޯލިޝަނުގައި ހިމެނޭ ޑީއާރްޕީގެ އޮފިޝަލަކު މިއަދު ބުނީ އެ އޮފީހުގެ ބޭރު ފާރަށާއި ބިއްލޫރި ދޮރަށް ތާރު ޖަހާފައި ވަނީ ރޭގެ ވަގުތެއްގައި ކަމަށެވެ. އެހެން ނަމަވެސް އެކަން ކުރީ ކޮން ބަޔަކުކަން ނޭނގޭ ކަމަށް އޭނާ ބުންޏެވެ.
މިދިޔަ ހަފުތާގެ ތެރޭގައި ހިތަދޫގައި ހުރި ޕީޕީއެމްގެ ތިން ތަނަކަށް ވަނީ ކަޅު ދަވާދު ވެސް ޖަހާފަ އެވެ.
އޭގެ ތެރޭގައި ހިތަދޫގައި ހުންނަ ޕީޕީއެމް އޮފީހުގެ ފާރަށާއި އެ ރަށު ހުކުރު މިސްކިތް ކައިރީ ހުންނަ ޕީޕީއެމް ޖަގަހައިގެ އިތުރުން ލިންކް ރޯޑްގައި ދާދި ފަހުން ހުޅުވި ޒުވާނުންގެ ޖަގަހަ އަށް ވެސް ކަޅު ދަވާދު ޖަހާފައިވެ އެވެ.