މަރަދޫ ގޯދިއްޔާ އިން އިންތިޒާމްކޮށްގެން ކޮންމެ އަހަރަކު ރޯދަމަހު ކުރިއަށް ގެންދާ ފުޓްސަލް މުބާރާތުގެ ފުރަތަމަ މެޗްގައި ބައްދަލު ކުރާ ދެޓީމަކަށް ފޭދޫ އެފްވައިސީ އާއި ރިއަލް މަރަދޫ ހޮވިއްޖެ އެވެ.
އިއްޔެ ރޭ އިރުޝާދިއްޔާ ސްކޫލްގައި ކުރިއަށް ގެންދިޔަ ގުރުލުމުގެ ރަސްމިއްޔާތުގައި ބައިވެރިވި 20 ޓީމް ސީޑް ކޮށް ގުރުލުން ވަނީ ކުރިއަށް ގެންގޮސްފަ އެވެ.
އެގޮތުން ގްރޫޕް އޭގައި ހިމެނެނީ މިދިޔަ އަހަރުގެ ޗެމްޕިއަން އެފްވައިސީގެ އިތުރުން، ރިއަލް މަރަދޫ، އެފްސީ ރެސްޕެކްޓް، އޯޕީއެޗެ ސްޕޯޓްސް އަދި ފްރައިންޑްސް ކްލަބެވެ.
ގްރޫޕް ބީގައި ހިމެނެނީ ހަބޭސް އާއި ޒިލޮޓް، މާކަރީ ޔުނައިޓެޑް އަދި ކްލަބް މަރަދޫ އާއި ޔުނިއަން ސްޕޯޓްސް ކްލަބްއެވެ.
ގްރޫޕް ސީގައި ހިމެނޭ ޓީމް ތަކަކީ ޝަންގްރިއްލާ ޔުނައިޓެޑް ، އެފްސީ ޒެފިއާ، އެފްއާރްޓީ، އަބާނީ އަދި ޓީއެފްޓީ ވޮރިއާސް އެވެ.
ގްރޫޕް ޑީގައި ހިމެނެނީ ޒިލޯން އާއި މަލްޓީ ޖީނިއަސް ސިޓީ އަދި ޔަންގް ވަންސް، އެފްސީ ކެންޑާ އަދި ރެސްކިއު ޓީމެވެ،
ޖުލައި 15 ވަނަ ދުވަހުގެ ރޭ ފެށުމަށް ހަމަޖެހިފައިވާ މި މުބާރާތުގައި ގްރޫޕް ސްޓޭޖްގެ 3 މެޗް ކޮންމެ ރެއަކުވެސް ކުޅޭނެއެވެ. މެޗް ފެށުމަށް ހަމަޖެހިފައި ވަނީ ރޭގަނޑު 9:30 ގައެވެ.
ނަމަވެސް މުބާރާތް ހުޅުވާ މެޗް ފެށުމަށް ހަމަޖެހިފައި ވަނީ 15 ޖުލައި ދުވަހުގެ ރޭ 10 ޖަހާ އިރު އެވެ.
ޗެމްޕިއަން ޓީމަށް 50،000 ރުފިޔާގެ ފައިސާގެ އިނާމް ހުށަހަޅާފައިވާ މި މުބާރާތުގެ މެއިން ސްޕޮންސާ އަކީ އެސްޓީއޯ އިން ވިއްކާ ކުރުގާ ކޮފީ އެވެ.
ކޯ- ސްޕޮންސަރުންނަކީ އަލޯރާ އާއި އައި ކެއާ އަދި ކޫއްޑޫ ފިޝަރީޒް އެވެ. އޮފިޝަލް އެނާޖީ ޑްރިންކަކީ ޕަވާ ހޯން އެވެ.