ކުޑަ ކުދިންގެ ކުޅިވަރު ހަރަކާތްތައް ކުރިއަށް ގެންދިއުމަށް ކެރިއާ ވިޓަމިން ފައުންޑޭޝަން (ސީވީއެފް) ގެ ނަމުގައި ފަންޑޭޝަނެއް ލޯންޗްކޮށް، ފަންޑް ފޮށްޓެއް ހުޅުވައިފި އެވެ.
ކެރިއާ ފައުންޑޭޝަން ސޮސައިޓީގެ ދަށުން ހިންގާ ސީވީއެފްގެ ފަންޑް ފޮށި އިއްޔެ ރަސްމީކޮށް ފޭދޫ ސްކޫލްގައި ބޭއްވި ހަފުލާއެއްގައި ހުޅުއްވައި ދެއްވީ ފޭދޫގައި ހުންނަ ބިޒްނަސް ޑިޕާޓްމަންޓްގެ ޑިރެކްޓަރު އަހުމަދު ރަޝީދު އެވެ.
އިއްޔެ ވެސް ގިނަ ބަޔަކު ފޮށްޓަށް ފައިސާ ހަދިޔާކޮށްފައިވެ އެވެ.
އެގޮތުން އިއްޔެ އިން ފެށިގެން ފައިސާ ހަދިޔާ ކުރުމުގެ ފުރުސަތު އާންމުކޮށް ވަނީ ހުޅުވާލާފަ އެވެ. ފޮށި ބަހައްޓާފައި ހުންނާނީ ފޭދޫ ދަލޫޒް ޕްރިންޓް އޮފީހުގަ އެވެ.
ސީވީއެފްގެ ފައުންޑާ ހައްވާ ޝަހީނާ މުހައްމަދު ބުނީ އޭގެ އެންމެ ބޮޑު މަގުސަދަކީ ކުދިންނަށް އަމާޒުކޮށްގެން ތަފާތު އެކި ކަހަލަ ކުޅިވަރު ހަރަކާތްތައް ކުރިއަށް ގެންދިއުން ކަމަށެވެ.
އެހެންވެ އެފަދަ ހަރަކާތްތައްކެއް ހިންގުމަށް ފައިސާ ބޭނުންވާތީ ފަންޑް ރައިޒް ކުރަން ފޮށްޓެއް ހުޅުވީ ކަމަށް އޭނާ ބުންޏެވެ.
ޝަހީނާ ބުނީ ޔޫއެންޑީޕީ އާއި ޔޫއެންއެފްޕީ އަށް ޕްރޮޕޯސަލް ހުށަހަޅައިގެން ވެސް ފައިސާ ހޯދަން މަސައްކަތް ކުރި ކަމަށެވެ. ނަމަވެސް އެ ޖަމާއަތްތަކުން ބަލާ މިންގަނޑުން ތަޖުރިބާ މަދުވުމުން ފައިސާ ލިބުން ފަސޭހަ ކަމަކަށް ނުވި ކަމަށް އޭނާ ބުންޏެވެ.
އޭގެ އިތުރަށް އެހީ ހޯދުމަށް އައްޑޫގެ ވިޔަފާވެރިންގެ ފަރާތުން ވެސް އެދުނު ކަަމަށް ޝަހީނާ ބުންޏެވެ.