އެމެރިކާގެ ރައީސް ޑޮނަލްޑް ޓްރަމްޕްގެ ރުޅިގަނޑު ސިޓީއެއްގައި މަޖިލީހުގެ ރައީސާ، ނެންސީ ޕެލޯސީއަށް ބާލައިފިއެވެ.
ހަ ސޮފްހާގެ ސިޓީގައި ޓްރަމްޕް ވަނީ އޭނާގެ އިތުބާރު ނެތްކަމުގެ ވޯޓު ނަގައި ބޭރުކުރަން ކުރާ މަސައްކަތަކީ އެމެރިކާގެ ޑިމޮކްރަސީއާ ހަނގުރާމަ އިއުލާން ކުރުން ކަމަށެވެ. ޓްރަމަޕް މަގާމުން ދުރުކުރަން ބުދަ ދުވަހު ވޯޓަށް އަހަން ހަމަޖެހިފައިވާއިރު ބެލެވެނީ ވޯޓު ބުރަވާނީ ޓްރަމްޕާ ދެކޮޅަށް ކަމަށެވެ.
ޓްރަމްޕް ބޭރުކުރަނީ ޔުކްރެއިންގެ ރައީސް އަށް ފޯނުން ގުޅުއްވައި މަގާމުގެ ނުފޫޒު ނަހަމަ ގޮތުގައި ހިފުމުގެ މަގުސަދުގައި ކުރީގެ ނައިބު ރައީސް ޖޯ ބައިޑެން ތަހުގީގު ކުރަން ބާރު އެޅިކަމުގެ ތުހުމަތުގައެވެ. ދުވަސްވީ ތަހުގީގެއް ވެސް އެ މައްސަލާގައި ކުރިއަށް ގެންގޮސްފައިވާއިރު ތަހުގީގުން ޓްރަމްޕް ނުފޫޒު ފޯރުވިކަން ސާބިތުވެފައިވެއެވެ. ނަމަވެސް ޓްރަމްޕް ވަނީ އެ އަމަލަކީ ކޮރަޕްޝަން ހުއްޓުވުމަށް ކުރެއްވި މަސައްކަތެއްގެ ގޮތުގައި ސިފަކޮށް މައްސަލައިން ރެކިވަޑައިގަތުމަށް މަސައްކަތް ކުރައްވާފައެވެ.
މާދަމާ ނަގާ ވޯޓުގެ ކުރިން ޓްރަމްޕް، ޕެލޮސީ އަށް ފޮނުވި ސިޓީގައި ވަނީ އޭނާއަށް ދިފާއު ވާން ގާނޫނު އަސާސީ އިން ލިބޭ ފުރުސަތު ލިބިފައިނުވާ ކަން ފާހަގަކޮށްފައެވެ. އަދި އެ މައްސަލަ ފަށައިގެން ނިންމަނީ ވެސް އޮންނަ އުސޫލުން ބޭރުން ކަމަށާއި، 'ޑިއު ޕްރޮސެސް' އިން ބޭރުން ކަމަށް ވިދާޅުވިއެވެ.
ޕެލޯސީ ވިދާޅުވީ، ޓްރަމްޕް ފޮނުއްވި ސިޓީ އެއްކޮށް ކިޔަން އަދި ފުރުސަތެއް ލިބިފައިނުވާ ކަމަށާއި، ނަމަވެސް އޭގައި ޓްރަމްޕް ފޮނުވަން އުޅޭ މެސެޖު ދަނެގަނެވިފައިވާ ކަމަށެވެ. އަދި އެއީ އެމަނިކުފާނު ކުރެއްވި ވަރަށް ގޮތް ކުޑަ އަމަލެއް ކަމަށް ޕެލޯސީ ވިދާޅުވިއެވެ.
ޓްރަމްޕް ބޭރުކުރަނީ ދެ ދައުވާއެއްގެ މައްޗަށް ބިނާކޮށެވެ. އެއީ އެނގިހުރެ ގާނޫނާއި ޚިލާފު ވުމާއި، އެނގިހުރެ ހެކި ހިފެހެއްޓުމުގެ ދައުވާއެވެ. ގާނޫނާ ޚިލާފުވީ ޓްރަމްޕް، ތަހުގީގަށް އެއްބާރުލުން ނުދިނުމާއި މަޖިލީހުގައި ހެކިބަސް ދޭން ދެކޮޅު ހެދުމުގެ ސަބަބުންނެވެ.
ހައުސް އޮފް ރެޕްރެސެންޓޭޓިވްސް އިން ޓްރަމްޕް ބޭރުކުރަން ފާސް ވެއްޖެނަމަ އެމަނިކުފާނު ވާނީ އެމެރިކާ ތާރީޚުގައި ވެސް އިތުބާރު ނެތްކަމުގެ ވޯޓު ނަގައި ބޭރުކުރެވުނު ތިންވަނަ ރައީސަށެވެ. ވޯޓުން ޓްރަމްޕް ބޭރު ކުރެވޭނެ ކަމަށް ލަފާ ކުރެވޭއިރު އެގޮތަށް ވެއްޖެނަމަ ދެން މައްސަލަ ދާނީ ސެނެޓަށެވެ. ސެނެޓުގައި ދެ ޕާޓީގެ ސެނެޓަރުން ވަކި ކޮޅަކަށް ނުޖެހި މައްސަލާގައި ގޮތް ނިންމަން ޖެހޭނެއެވެ.