ތިން ކުދިންނާއި އެކު އދ. މާމިގިލިން ފުރައިގެން ފ. ފީއައްޔަށް ދަތުރު ކުރި ޑިންގީ ގެއްލިގެން ހޯދަމުން ދަނިކޮށް ފެނިފައިވާ ކަމަށް ފުލުހުން ބުނެފިއެވެ.
ފުލުހުންގެ މީޑިއާ އޮފިޝަލް ވިދާޅުވީ ޑިންގީ ފ. ހިމިތީ އާއި 3 މޭލު ބޭރުން ފެނިފައިވާ ކަމަށެވެ. ޑިންގީ ފެނުނީ މިރޭ 20:10 ހާއިރު އެ ޑިންގީ ހޯދުމުގައި ހަރަކާތްތެރިވި ސީ އެމްބިއުލާންސް ލޯންޗަކަށެވެ. އަދި ޑިންގީން ދަތުރުކުރި އެންމެންގެ ހާލު ރަނގަޅު ކަމަށް ފުލުހުން ބުންޏެވެ.
ފުލުހުން ބުނީ ގެއްލުނު ޑިންގީގައި ދަތުރުކުރީ 9 އަހަރުގެ ކުއްޖަކާއި، 11 އަހަރުގެ ކުއްޖަކާއި، 13 އަހަރުގެ ކުއްޖެއްގެ އިތުރުން ފިރިހެނަކުކަމަށެވެ.
ޑިންގީ ގެއްލުނުކަން ސިފައިންނަށް ރިޕޯޓުކޮށްފައިވަނީ މިއަދު ހަވީރު 16:53 ގައެވެ. އެހާހިސާބުން ފެށިގެން ސިފައިން ވަނީ ޑިންގީ ހޯދުމަށް ބޮޑު އޮޕަރޭޝަނެއް ފަށާފައެވެ. މީގެ އިތުރުން އެ ހިސާބުތަކުގެ އާއްމު ރައްޔިތުންވެސް ވަނީ ޑިންގީ ހޯދުމަށް ނިކުމެފައެވެ.
މި ދުވަސްވަރަކީ ރާއްޖޭގެ މޫސުން ވަރަށް ގޯސް ދުވަސްވަރެކެވެ. އދ އަތޮޅުން ތ އަތޮޅަށް ވަނީ ޔެލޯ އެލާޓްވެސް ނެރެފައެވެ.