އިންޑިޔާ ސަރުކާރާ ދެކޮޅަށް އެގައުމުގެ ގިނަ އަދަދެއްގެ ރައްޔިތުން ކުރަމުންދާ މުޒާހަރާގައި އިއްޔެ ވެސް ހަ މީހަކު މަރުވެފައިވާ ކަމަށް ޚަބަރު ލިބިއްޖެއެވެ.
މިމުޒާހަރާތައް ކުރިއަށް ގެންގޮސްފައިވަނީ އިންޑިޔާގެ އުތުރުން އުއްތަރް ޕްރަދޭޝްގައެވެ. 32 އިތުރު މީހަކު ފުލުހުންނާ މުޒާހަރާގެ ބައިވެރިންނާ ދެމެދު ހިނގި ކުރިމަތިލުމެއްގައި ޒަޚަމްވެފައިވެއެވެ.
ސަރުކާރުން ހުށައަޅާފައިވާ "ސިޓިޒަންޝިޕް ގާނޫނާ" ދެކޮޅަށް އެތައް ބަޔަކު މުޒާހަރާ ކުރަމުންދާއިރު މިހާތަނަށް މުޒާހަރާތަކުގައި 13 މީހަކު މަރުވެފައިވާ ކަމަށް ރިޕޯޓްތައް ބުނެއެވެ. އިންޑިޔާ ސަރުކާރުން ހުށައެޅި މި ބިލަކީ މުސްލިމުންނާ ދެކޮޅަށް މުސްލިމުން އިތުރަށް ނިކަމެތި ކުރުމަށް ހުށައެޅި ބިލެއް ކަމަށް މުޒާހަރާގައި ބައިވެރިން އަންނަނީ ގޮވަމުންނެވެ.
ފުލުހުން ވަނީ މުޒާހަރާ ނުކުރުމަށާއި އެއްވެ ނޫޅުމަށް ގޮވައި ސަރަހައްދުތައް ބަންދުކޮށްފައެވެ. ނަމަވެސް އެތައް ބަޔަކު އެކި ހިސާބުތަކުގައި މަގުތަކަށް ނިކުމެ މުޒާހަރާ ކުރެއެވެ.
އިންޑިޔާ ސަރުކާރުން ވަނީ ބްރޯޑްކާސްޓަރުންނަށް ބްރޯޑްކާސްޓު ކުރުމުގައި އަނިޔާވެރިވާ މަންޒަރުތައް ނުދެއްކުމަށް އިލްތިމާސް ކޮށްފައެވެ. އެކަން ކޮށްފައިވަނީ ރައްޔިތުންނާ މެދު ޚާއްސަކޮށް މުސްލިމުންނާ މެދު އިންޑިޔާ ސަރުކާރުން އަމަލުކުރަނީ ލާއިންސާނީ ގޮތަކަށް ކަން ދުނިޔެއަށް ނުދެއްކުމަށް ކަމަށް މުސްލިމުން ބުނެއެވެ.
މަރުވި ހަ މީހުންގެ ތެރެއިން ފަސް މީހެއްގެ ގަޔަށް ވަޒަން އަރާފައިވާ ކަމަށް ސިއްހީ ޚިދުމަތް ދިނުމަށް ގެންދިޔަ ފަރާތްތަކުން ވަނީ ބުނެފައެވެ. ނަމަވެސް އިންޑިޔާ ފުލުހުންގެ ވެރިޔާ، ސިންގްހ ވަނީ އެއްވެސް މީހެއްގެ ގަޔަށް ފުލުހުން ބަޑި ޖަހާފައިނުވާ ކަމަށް ބުނެފައެވެ.
އުއްތަރް ޕްރަދޭޝްގެ 10 ސަރަހައްދެއްގައި އިއްޔެ މުޒާހަރާ ކުރިއެވެ. މީގެ އިތުރުން ވެރިރަށް ނިއު ދިއްލީގައި ވެސް އެތައް ސަތޭކަ މުސްލިމުންނެއް ނިކުމެ ވަނީ އިންޑިޔާ ސަރުކާރާ ދެކޮޅަށް މުޒާހަރާ ކޮށްފައެވެ. މުސްލިމުން ޖަމާވެފައިވަނީ އިންޑިޔާގެ އެންމެ ދުވަސްވީ މިސްކިތް ކަމަށްވާ ޖަމާ މަސްޖިދް ކައިރިއަށެވެ.