އައްޑޫސިޓީ ކައުންސިލުން އިންތިޒާމްކޮށްގެން ބާއްވާ "އައްޑޫ ފުޓްބޯލް ޗެމްޕިއަންޝިފް" ފުޓްބޯޅަ މުބާރާތުގެ ގުރުލުން މިރޭ ބާއްވަން ނިންމައިފިއެވެ.
މުބާރާތުގެ ގުރުލުމުގެ ރަސްމިއްޔާތު ބޭއްވުމަށް ނިންމާފައިވަނީ މިރޭ 8 ޖަހާއިރު ސ. ގަމު އިކުއޭޓަރ ވިލެޖުގެ ބުލޫ ލެގޫންގައެވެ.
މި މުބާރާތުގައި ހަތް ބައިވެރިވި ނަމަވެސް މިރޭ ގުރުލުން ބާއްވާއިރު އެއް ޓީމު ވަނީ މުބާރާތުން ވަކިވެފައެެވެ. މުބާރާތުން މިހާރު ވަކިވެފައިވަނީ މަރަދޫފޭދޫ ޓީމެވެ.
މުބާރާތުގައި ވާދަކުރާ ޓީމް ތަކަކީ ހިތަދޫގެ ތިން ޓީމަކާއި، މަރަދޫ ޓީމަކާއި، ފޭދޫ އާއި މީދޫގެ ޓީމެކެވެ.
މުބާރާތުގައި ބައިވެރިވާ ޓީމްތައް:
– އެފްސީ ޒެފިޔާ (ހިތަދޫ)
– ކްލަބް ރިވެރިން (ހިތަދޫ)
– އެފްސީ ބޭރުމަތި (ހިތަދޫ)
– ގޯދިއްޔާ (މަރަދޫ)
– ފޭދޫ ސްޕޯޓްސް (ފޭދޫ)
– މުލިމަތި (މީދޫ)
އައްޑޫ ކައުންސިލުން ބުނީ މި މުބާރާތް ބޭއްވުމުގެ މަގުސަދަކީ އައްޑޫ ޒުވާނުންގެ މެދުގައި އެއްބައިވަންތަކަން އަށަގަނުވައި ކުޅިވަރުގެ ރޫޙް އާލާކޮށް އައްޑޫގައި ހުނަރުވެރި ފުޓްބޯޅަ ކުޅުންތެރިން އުފައްދައި ވާދަވެރި މާހައުލެއްގައި އެކުޅުންތެރިންނަށް ކުޅުމުގެ ފުރުސަތު ހޯދައިދިނުން ކަމަށެވެ.
މި މަހުގެ 26 ވަނަ ދުވަހު ބާއްވާ މި މުބާރާތުގެ މެޗުތައް ކުޅޭނީ އައްޑޫ ފުޓްބޯޅަ ސްޓޭޑިއަމްގައެވެ. މި މުބާރާތަށް އައްޑޫ ކައުންސިލުން ވަނީ 1 ލައްކަ ރުފިޔާ ހަމަޖައްސާފައެވެ.