މާލޭގައި ކެފޭ އުސޫލުން މަސްތުވާތަކެތި ވިއްކި ދެ ގެއެެއް ފާސްކޮށް 21 މީހަކު ފުލުހުންގެ ބެލުމުގެ ދަށައް ގެންގޮސްފިއެވެ.
ފުލުހުންގެ މީޑިއާ އޮފިޝަލް ވިދާޅުވީ ޑްރަގް އެންފޯސްމަންޓު ޑިޕާޓުމަންޓުން ހިންގި ހާއްސަ އޮޕަރޭޝަނެއްގައި ފާސްކޮށްފައިވަނީ ޏަމްޏަމްގެ އާއި އެވަރެސްޓު އާގެ ކަމަށެވެ. މި ދެގެއިންވެސް މަސްތުވާތަކެތި ކަމަށް ޝައްކު ކުރެވޭ ތަކެއްޗާއި މީހުން ހައްޔަރުކޮށްފައިވާ ކަމަށެވެ.
ފުލުހުން ބުނީ ޏަމްޏަމްގެ ބަލައި ފާސްކޮށް އެގެއިން ދިވެހި އަންހެނަކާއި ދިވެހި ނުވަ ފިރިހެނުންނާއެކު ޖުމުލަ 10 މީހުން ހައްޔަރުކޮށްފައިވާ ކަމަށެވެ.
މީގެ އިތުރުން އެވަރެސްޓް އާގެ ފާސްކޮށް، އެގެއިން ދިވެހި ދެ އަންހެނުންނާއި 8 ދިވެހި ފިރިހެނުންގެ އިތުރުން ބަންގްލަދޭޝްގެ ފިރިހެނަކު އެކު ޖުމްލަ 11 މީހަކު ވަނީ ހައްޔަރުކޮށްފައެެވެ.
ފުލުހުން ބުނީ މި ދެގެއިން ހައްޔަރު ކުރި މީހުންވެސް ހައްޔަރުކޮށްފައިވަނީ މަސްތުވާން ތިއްބާއެވެ.
ފުލުހުން ދަނީ މާލޭގައި ކެފޭގެ އުސޫލުން މަސްތުވާތަކެތި ވިއްކާ ތަންތަން ބަލައި ފާސްކޮށް އެކަމަށް ތުހުމަތު ކުރެވޭ މީހުން ހައްޔަރު ކުރަމުންނެވެ.