ތައިލޭންޑްގެ ވެރިރަށް ބެންކޮކްގައި ރޭ ހިނގި ނުރައްކާތެރި ކާރު އެކްސިޑެންޓެއްގައި ތިން ދިވެއްސަކަށް އަނިޔާވެ އޭގެ ތެރެއިން އެކަކު ހާލު ދެރަވެ އައިސީޔޫގައި ފަރުވާ ދެމުން އެބަ ދެއެވެ.
މިހާދިސާ ހިނގާފައިވަނީ ރޭ ދަންވަރު ބެންކޮކް ގަޑިން 3:30 އެހާކަށް ހާއިރެވެ. މި އެކްސިޑެންޓު ހިނގާފައިވަނީ ކާރު ފުރޮޅާލައިގެން ކަމަށް މައުލޫމާތު ލިބެއެވެ.
ޚަބަރު ލިބޭ ގޮތުގައި ކާރު ދުއްވަން ހުރި ޑްރައިވަރަށް ނިދި ޖެހި، ކޮންކްރީޓް ގަނޑަކަށް އަރައި ކާރު ފުރޮޅާލީއެވެ. މިކަމާ ގުޅޭގޮތުން ފޮރިން މިނިސްޓްރީގެ ރަސްމީ ބަހެއް އަދި ލިބިފައިނުވި ނަމަވެސް ކާރު ޑްރައިވަރު ހައްޔަރުކޮށްފައިވާ ކަމަށް މައުލޫމާތު ލިބެއެވެ.
މިހާދިސާގައި އައިސީޔޫ ގައި ފަރުވާ ދެމުން ދަނީ އައްޑޫ ސިޓީ ހުޅުދޫ އަހުމަދު ސައީދަށެވެ. އޭނާގެ ހާލު ސީރިއަސް ކަމަށް މައުލޫމާތު ލިބެއެވެ.