ސ. ހިތަދޫ ރީޖަނަލް ހޮސްޕިޓަލުން ޑައިލިސިސް ހިދްމަތް ޖޫން 8 ވަނަ ދުވަހު ފެށި އިރު ހިދްމަތަށް ނަގާ އަގު ބޮޑުވެގެން އާއްމުންގެ ޝަކުވާ ބޮޑުވެފައިވާ އިރު ހިދްމަތަށް ނަގާ އަގު ކުޑަކޮށް ދެއްވާނެ ކަމަށް އެންސްޕާ އިން ބުނެފިއެވެ.
އެންސްޕާގެ އޮފިޝަލަކު މިއަދު ވިދާޅުވީ ހިތަދޫ ރީޖަނަލް ހޮސްޕިޓަލުން ހިދްމަތް ފަށާފައިވަނީ ރަސްމީކޮށް އެންސްޕާ އާ މަޝްވަރާ ނުކޮށް ކަމަށާއި ހިދްމަތް ފެށުމުގެ ކުރިން އަގާއި މެދު މަޝްވަރާ ކުރެވުނު ނަމަ އެކަން ހައްލު ވާނެ ކަމަށެވެ.
"އަޅުގަނޑުމެންނަކަށް ނެތް ރަސްމީކޮށް ހިދްމަތް ފެށިކަން އެނގިފަކާއެއް. އެކަމަކު މިއަދު މި އެނގުނީ އަޅުގަނޑުމެންނަށް ރަސްމީކޮށް ސިޓީ ލިބުމާ އެކު އަގު ބަދަލުކޮށް ދޭނަން." އޭނާ ވިދާޅުވި އެވެ.
އޮފިޝަލް ވިދާޅުވީ ހުޅުމާލެ އާއި އައިޖީއެމްއެޗުން ޑައިލިސިސް އަށް ނަގާ އަގުބޮޑުވެން ބޮޑު މައްސަލަ ތަކެއް ދިމާވުމާއި ގުޅިގެން ވަގުތުން އެކަން ހައްލު ކުރެވިފައި ވަނިކޮށް ހިތަދޫ ރީޖަނަލް ހޮސްޕިޓަލުން އަލުން ބޮދު އަގުގައި ހިދްމަތް ފެށުމުން ކަންބޮޑުވާ ކަމަށެވެ.
ހިތަދޫ ރީޖަނަލް ހޮސްޕިޓަލް ހިންގެވުމާއި ހަވާލުވެ ހުންނެވި ހަދީޖާ ހަފްސާ ވިދާޅުވީ އަގު ބަދަލުކޮށް ދިނުމަށް އެދި އެންސްޕާ އަށް މިއަދު ސިޓީ ފޮނުވާފައިވާ ކަމަށެވެ.
"އަޅުގަނޑުމެންނަށް އެންސްޕާއިން ފޮނުވާފައިވާ އަގު ލިސްޓަކަށް ފައިސާ މި ނަގަނީ. އެހެންވެ އަގު ބަދަލުކޮށް ނެގޭކަށް ނޯވޭ." ހަފްސާ ވިދާޅުވި އެވެ.
އަމިއްލަ ފަރާތަކުން ހަދިޔާކުރި ދެ ޑައިލިސިސް މެޝިން އިންސްޓޯލް ނުކުރެވި ގިނަ ދުވަސްތަކެއް ވެފައި ވަނިކޮށް ހޮސްޕިޓަލުގައި ޑައިލިސިސް ސެންޓަރެއް ހަދާދީފައި ވަނީ ވެސް އައްޑޫގެ ހެޔޮ އެދޭ މީހެކެވެ.
އެންސްޕާއިން ބުނީ ކުރިން ނެގި އަގާއި މެދު ގޮތެއް ނުނިންމުނު ކަމުގައި ވިޔަސް މިއަދުން މިއަދަށް އަގު ދަށްކޮށްދޭނެކަމަށެވެ.
ހިތަދޫ ރީޖަނަލް ހޮސްޕިޓަލުން ޑައިލިސިސް މިހާރު ހެދެނީ 1000 ރުފިޔާއަށެވެ. އައިޖީއެމްއެޗާއި ހުޅުމާލެ ހޮސްޕިޓަލުން މިހިދްމަތަށް ނަގަނީ 400ރުފިޔާ އެވެ.
ކިޑްނީ ޑައިލިސިސްގެ ހިދްމަތް ހޯދަން ޖެހޭ 19 މީހަކު އެބަތިބިކަމަށް ރަސްމީ ފަރާތްތަކުން ވަނީ ބުނެފަ އެވެ. އެ މީހުން އުޅެމުން އަންނަނީ މާލެ އާއި އަވަށްޓެރި ގައުމުތަކުގަ އެވެ.