ސ. ފޭދޫ ސްޕޯޓްސް ކުލަބުން އިންތިޒާމްކޮށްގެން ގަމުގައި ބާއްވަން ތައްޔާރު ވަމުން އަންނަ "އަލިކެފޭ އައްޑޫ ސްޓްރީޓް ސޮކަ 2013"ގެ ގުރުއަތުލުން މި މަހު 6 ގައި ބާއްވާނެ ކަމަށް އެ ކުލަބުން ބުނެފި އެވެ.
އެ ކްލަބްގެ ޖެނެރަލް ސެކްރެޓަރީ އަލީ ސަރީރު (ޕީޓަ) ބުނީ މުބާރާތުގެ ގުރުއަތުލުން އޮންނާނީ ޖެނުއަރީ ހަ ވަނަ ދުވަހުގެ ރޭ 8:00 ގައި ގަމުގެ ޒުވާނުންގެ މަރުކަޒުގައި ކަމަށެވެ، އޭނާ ބުނީ މުބާރާތުގައި އައްޑޫގެ 16 ޓީމަކުން ވާދަ ކުރާއިރު މުބާރާތް ކުރިއަށް ގެންދާނީ ޓީމުތައް ހަތަރު ގްރޫޕަކަށް ބަހާލައިގެން ޕޮއިންޓް އުސޫލުން ކަމަށެވެ. މުބާރާތުގެ މެޗްތައް ކުޅޭނީ ގަމުގަ އެވެ.
މި މުބާރާތުގެ ޗެމްޕިއަން ޓީމަކަށް 30،000ރ. ހުށަހަޅާފައިވާ އިރު ރަނައަޕް ޓީމަށް ވަނީ 10،000ރ. ހުށަހަޅާފައިވެ އެވެ.
ގްލޯބަލް ލިންކްސް ޕްރައިވެޓް ލިމިޓެޑުން ރާއްޖެއަށް އެތެރެކުރާ އަލިކެފޭއިން މެއިން ސްޕޮންސާރ ކޮށްފައިވާ މި މުބާރާތުގެ އޮފިޝަލް އެނަރޖީ ޑްރިން ޕާޓްނާ އަކީ ޕަވަރ ހޯން އެނަޖީ ޑްރިންކް އެވެ. މުބާރާތުގެ އޮފިޝަލް މީޑިއާ އަކީ "އައްޑޫ ލައިވް" އެވެ.