މާލެ ދަތުރުކުރަމުން ދިޔަ ބޯޓެއްގައި ތިބި ކުޑަ ދެ އަންހެން ކުދިންނަށް ޖިންސީ ގޯނާ ކުރިކަމުގެ ތުހުމަތުގައި މީހަކު ހައްޔަރުކޮށް، ޖެންޑާ މިނިސްޓްރީން މައްސަލަ ބަލަން ފަށައިފިއެވެ.
ޚަބަރު ލިބޭ ގޮތުގައި ދެ އަންހެން ކުދިންނަށް ގޯނާ ކުރީ ބޯޓު ފަޅުވެރިޔެކެވެ. އޭނާގެ ޝިކާރައަށް ވެގެން ގޮސްފައިވަނީ އުމުރުން 13 އަދި 11 އަހަރުގެ ކުޑަ ދެކުދިންނެވެ.
މައުލޫމާތު އެނގޭ މީހަކާ ހަވާލާދީ "ސަން" އިން ރިޕޯޓުކޮށްފައިވާ ގޮތުގައި މީނާ މިއަމަލު ހިންގީ އެކުދިން ނިދާފައި ތިއްބާ ކަމަށާއި، ބޮޑު ކުއްޖާއަށް ހޭލެވިގެން މަންމަ ކައިރީ ބުނުމުން ޖެންޑާއަށް ރިޕޯޓުކުރީ މަންމަ ކަމަށެވެ.
ބޯޓު މާލެއަށް ލެފުމާއެކު ފުލުހުންނާއި މިނިސްޓްރީގެ ޓީމަކުން އައިސް އެކަން ކުރި މީހާ ހައްޔަރުކޮށްފައިވާއިރު މިނިސްޓްރީން ވަނީ ކުޑަކުދިންނާ ބެހުނު މައްސަލަ ބަލަން ފަށާފައިވާ ކަން ކަށަވަރުކޮށްދީފައެވެ.