އައްޑޫ އިންޓަނޭޝަނަލް އެއާޕޯޓު ކޮމްޕެނީ (އޭއައިއޭ)ގެ މެނޭޖިން ޑިރެކްޓަރުގެ މަގާމަށް ސ. ހިތަދޫ، ސީވިއު، ގައިސް ނަސީރު ހަމަޖައްސަވައިފިއެވެ.
ފިނޭންސް މިނިސްޓްރީގެ މީޑިއާ އޮފިޝަލް ވިދާޅުވީ ގައިސް ނަސީރު އައްޑޫ އިންޓަނޭޝަނަލް އެއާޕޯޓުގެ އެމްޑީގެ މަގާމަށް ޕްރައިވަޓައިޒޭޝަން ބޯޑުން ހަމަޖައްސަވާފައިވާ ކަމަށެވެ.
އެނގިފައިވާ ގޮތުގައި ގައިސް ރަސްމީކޮށް މަގާމާއި ހަވާލުވުމަށް ހަމަޖެހިފައިވަނީ 2020 ޖެނުއަރީ 5 ވަނަ ދުވަހުއެވެ.
އައްޑޫ އެއާޕޯޓްސް ކޮމްޕެނީއަށް އެމްޑީއަކު ނެތި އަހަރު ދުވަސް ފާއިތުވެގެން ގޮސްފައިވާ އިރު އެކަމާއި އައްޑޫގެ ބައެއް ފަރާތްތަކުން ވަނީ ކަންބޮޑުވުން ފާޅުކޮށްފައެވެ.
ކުންފުނީގެ އެމްޑީއަކަށް އެންމެ ފަހުން ހުންނެވީ ރައީސް ޔާމީންގެ ވެރިކަމުގައި އެމަގާމު ހަވާލު ކުރި މުހައްމަދު ލަޠީފުއެވެ. ލަޠީފު އޭއައިއޭގެ އެމްޑީކަމަށް ހަމަޖެއްސީ 2018 އެޕްރީލް 26 ވަނަ ދުވަހުއެވެ. ލަޠީފު މަގާމުން ވަކިކުރީ ނޮވެމްބަރ 22، 2018 ގައެވެ.
އައްޑޫ އިންޓަނޭޝަނަލް އެއާޕޯޓު ލިމިޓެޑް އަކީ ސަރުކާރުގެ 50 އިންސައްތަ ހިއްސާ އޮންނަ ކުންފުންޏެކެވެ. އޭއައިއޭގެ 30 ޕަސެންޓް ހިއްސާ ޗަމްޕާ ހުސެއިން އަފީފްގެ ކާސާ ހޮލްޑިންގްސްގައި އޮންނައިރު ދެން އޭއައިއޭގެ ހިއްސާދާރުންނަކީ މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އަދި އެސްޓީއޯ އެވެ. އެއިން ކޮންމެ ކުންފުންޏެއްގައި ވެސް އޭއިއޭގެ 10 ޕަސެންޓް ހިއްސާ އޮވެއެވެ.