މިމަހުގެ ދެވަނަ ދުވަހު ބ. އަތޮޅު ކަނޑުމަތިން ހިނގި ނުރައްކާތެރި އެކްސިޑެންޓުގައި ކަނޑު އަޑިޔަށް ދިޔަ ޑިންގީ އެމްއެންޑީއެފުން ނަގައިފިއެވެ.
މިއެކްސިޑެންޓުގައި ކައްޕި ނަސްރުﷲ މޫދަށް ގެއްލި ހަފްތާއެއް ވީއިރު ވެސް އަދިވެސް ފެނިފައެއް ނުވެއެވެ. ނަމަވެސް އެމްއެންޑީއެފުން މިއަދުވެސް ނަސްރު ހޯދުމުގެ މަސައްކަތް ވައިގެ މަގުންވެސް ކުރިއަށް އެބަ ގެންދެއެވެ.
އެމްއެންޑީއެފުން ބުނީ، އަޑިއަށް ދިޔަ ޑިންގީ ނަގާފައިވަނީ ބ. ދޮންފަނު ބޭރުން ކަމަށެވެ. އަދި އޭތި މިހާރު އެއަތޮޅު ދަރަވަންދުއަށް ވަނީ ގެންގޮސްފައެވެ. ނަސްރު ހޯދުމުގެ މަސައްކަތުގައި އެމްއެންޑީއެފުން އިއްޔެ ވަނީ ޑިންގީގެ އިންޖީނުގެ ބައެއް ކަމަށް ބެލެވޭ އެއްޗެއް ވެސް ހޯދާފައެވެ.
ނަސްރު ހޯދުމުގައި މިހާތަނަށް ކަނޑުގެ 120 ނޯޓިކަލް މޭލުގެ ސަރަހައްދެއް ވަނީ ބަލާފައެވެ. އެމްއެންޑީއެފްގެ ޑައިވަރުންގެ އިތުރުން ޑައިވިން ރޮބޮޓުވެސް ވަނީ މިހޯދުމުގައި ބޭނުންކޮށްފައެވެ.