ދިވެހިން މިއަދު މި ކުޅޭ ރީތި ފުޓްބޯޅައަކީ އައްޑޫ މީހުން ދަސްކޮށް ދިން ކުޅިވަރެއްް ކަމަށް އެފްއޭއެމްގެ ޑައިރެކްޓަރު އަލީ ސުޒޭން ވިދާޅުވެއްޖެ އެވެ.
ގޯދިއްޔާއިން އިންތިޒާމް ކޮށްގެން 2008 ވަނަ އަހަރުން ފެށިގެން ކުރިއަށް ގެންދާ ފުޓްސަލް މުބާރާތް ހުޅުވައި ދިނުމުގެ ރަސްމިއްޔާތުގައި ސުޒޭން ވިދާޅުވީ މާލެ ކައިރީގައި ރިސޯޓް ހަދައިގެން އެދު އަޅަން މާލެ މީހުނަށް ނޭގިގެން އުޅެނިކޮށް އެކަން ދަސްކޮށްދިނީ އައްޑޫ މީހުން ގޮސް ކަމަށާއި މާލެ އަށް ފުޓްބޯޅަ ތައާރަފްކުރީ ވެސް އައްޑޫ މީހުން ކަމަށެވެ.
"އަޅުގަނޑުމެން މިކުޅޭ ފުޓްބޯޅަ 2008 ވަނަ އަހަރު ދިވެހިންނަށް ލިބުނު ތައްޓަކީ އައްޑޫ މީހުން ދަސްކޮށްދިން ފުޓްބޯޅަ. މުހުތާރު ނަސިރު ޖެހި ލަނޑުގެ ކުރިން ފެނިގެން ދިޔަ ކުރު ޕާސްތަކާއި ކޮށްޓުން މާލެ މީހުންނަށް، އަޅުގަނޑުމެންނަށް ދަސްކޮށްދިނީ މި އައްޑޫ މީހުން." ސުޒޭން ބުންޏެވެ.
ސުޒޭން ބުނީ މާލެއިން ދުރުގައި މިހާ އޯގަނައިޒްކޮށް ފުޓްބޯޅަ މުބާރަތެއް ކުރިއަށް ގެންދިއުމަކުން ހައިރާނެއް ނުވާ ކަމަށެވެ.
ގޯދިއްޔާގެ ފަރާތުން މުބާރާތަށް ތައްޔާރުވެފައިވާ ފެންވަރާއި މެދު ސުޒޭން ވަނީ ތައުރީފްކޮށްފަ އެވެ.
ސުޒޭން އިތުރަށް ވިދާޅުވީ މުފީދުމެން، ހަސަނާ މެން މާލެ ގޮސް ދަސްކޮށްދިން ކުޅިވަރުން މިއަދު ދިވެހިން ކާމިޔާބް ހޯދަމުން އަންނަ ކަމަށެވެ. އަދި އަންނަ އަހަރު އައްޑޫއާއި މާލެ ގައި ކުރިއަށްގެންދާ ޗެލެންޖް ކަޕް ކުރިއަށް ގެންދިއުމުގައި މި ފަދަ މުބާރާތް އިންތިޒާމް ކުރާ ފަރާތް ތިބިކަމީ އެފެއޭއެމް އަށް ލިބިގެންދާނެ ކުރިއެރުމެއް ކަމަށެވެ.
"އެފްއޭއެމް އަށް ވެސް މިއަދު އުނދަގޫ މިގޮތަށް މިހާ ފުރިހަމަކޮށް ފުޓްބޯޅަ މުބާރާތެއް ކުރިއަށް ގެންދަން. އަޅުގަނޑު މިހިރީ ހަމަ ހައިރާންވެފައި މިތަން ތައްޔާރު ކޮށްފައިވާލެއް ފުރިހަމަކަމުން." ސުޒޭން ބުންޏެވެ.
ސުޒޭން ވިދާޅުވީ އައްޑޫގެ ފުޓްބޯޅަ އަޅާނުލައި ދޫކޮށްލައިގެން ތިބެވެން ނެތް ކަމަށެވެ. އަދި އެފްއޭއެމް އިން ހާއްސަ އިސްކަމެއް ދީގެން އައްޑޫގެ ފުޓްބޯޅަ ކުރިއަރުވަން މަސައްކަތް ކުރާނެ ކަމަށެވެ.