އައްޑޫ ސިޓީ، މަރަދޫ، ފޭދޫ އަދި މަރަދޫފޭދޫގައި އެމްޓީސީސީން ނަރުދަމާގެ މަސައްކަތް ކުރާތާ ތިން އަހަރުވެފައިވާ އިރު މަސައްކަތް ނުނިމި ދިގުލައިގެންދާތީ ރައްޔިތުން ކަންބޮޑުވުން ފާޅުކުރަން ފަށައިފިއެވެ.
ރައީސް ޔާމީންގެ ސަރުކާރުން އެމްޓީސީސީ އާއި މި ތިން ރަށުގައި ނަރުދަމާގެ މަސައްކަތް ހަވާލު ކުރީ 29 ފެބްރުއަރީ 2017ގައެވެ. އެއް އަހަރު ތެރޭ ނިންމަން ހަވާލު ކުރި މަސައްކަތް ދިގުލައިގެން ގޮސް ފާއިތުވި ދުވަސް ތަކުގައި ނަރުދަމާގެ އެއްވެސް މަސައްކަތެއް ކޮށްފައި ނުވެއެވެ.
"އައްޑޫލައިވް" އާއި މައުލޫމާތު ހިއްސާ ކުރި މީހަކު ބުނީ ނަރުދަމާގެ ހިދްމަތް ދޭން ނުފެށި ލަސްވަނީ ފެނަކައިގެ މައްސަލަ އަކާއި ގުޅިގެން ކަމަށް މީގެ ކުރިން އެމްޓީސީސީން ބުނެފައިވާ ކަމަށެވެ. ނަމަވެސް ފެނަކައިން ދޭން ޖެހޭ ހިދްމަތް ބަރާބަރަށް ފޯރުކޮށްދީފައިވާ ކަމަށް މައުލޫމާތު އެނގޭ މީހަކު ވަނީ ކިޔާދީފައެވެ.
"ތިން އަހަރު ނަރުދަމާ އެޅުމަށް މިއީ ބޮޑުވަރު، ރައީސް ޔާމީންގެ ސަރުކާރުގައި މަސައްކަތް ވަރަށް ބާރަށް ކުރިއަށް ގެންގޮސް އިންތިހާބުގެ ކުރިން ނިންމަން އުޅުނު، އެކަމަކު އިންތިހާބު ދުވަސްވަރު ވުމުން އެކަމެއް އެގޮތަށް ނުވި، އޭގެ ފަހުންވެސް މި ސަރުކާރުގައި މިދިޔައީ އެއް އަހަރު، ނަރުދަމާގެ ހިދްމަތް ނުލިބި"
ނަރުދަމާގެ ހިދްމަތް ނުލިބޭތީ މަރަދޫ، މަރަދޫފޭދޫ އަދި ފޭދޫގެ ރައްޔިތުންގެ ޝަކުވާ ވަރަށް ބޮޑެވެ. އެންމެ ބޮޑު ޝަކުވާ އަކީ އެރަށުގެ މަގުތައް ނަރުދަމާ އެޅުމަށް ކެނޑިގޮތަށް މަރާމާތު ނުކުރުމެވެ. މަރަދޫ، މަރަދޫފޭދޫ އަދި ފޭދޫގެ ބޯދު މަގުގެ އެއްކޮޅުން އަނެއް ކޮޅަށް ވަނީ ނަރުދަމާއެޅުމަށް ކޮނެފައެވެ. އެތަނުގެ ތާރުގަނޑު ކެނޑިގޮތަށް އެތަން މަރާމާތެއް ނުކުރެއެވެ.
"ބޮޑުމަގު ކޮނެފައި އޮންނަތާ 3 އަހަރު، މި މަންޒަރު ފެންނަ ވެރިއެއް މެމްބަރެއް، ކައުންސިލަރެއް ނެތް، އެމްޓީސީސީން ހަދާ ނަހަދާއެއް ނޭގެ، އެމީހުން އެއްވެސް މަސައްކަތެއް ނުކުރޭ، އަދިވެސް ނަރުދަމާގެ ހިދްމަތް ލިބޭނެ ދުވަހެއް ނޭގެ"
ރައިސް ޔާމީންގެ ސަރުކާރުގައި އޯޕެކް ފަންޑުގެ އެހީގައި އައްޑޫގެ ހުރިހާ ރަށެއްގެ ނަރުދަމާގެ މަސައްކަތް އެކި ފަރާތްތަކާއި ހަވާލު ކުރިއެވެ. ހުޅުދޫ މީދޫގެ ނަރުދަމާގެ މަސައްކަތް ހަވާލު ކުރީ،ލަންކާގެ ސިއަރާ ކުންފުންޏާއިއެވެ. އެކުންފުނިން މަސައްކަތް ނިންމައި ވަނީ ފެނަކަ އާއި ހަވާލު ކޮށްފައެވެ. އެ ދެރަށައް މިހާރު ނަރުދަމާގެ ހިދްމަތް ލިބެއެވެ.
މީގެ އިތުރުން ހިތަދޫ ދެކުނު ދާއިރާ އާއި އުތުރު ދާއިރާގެ ނަރުދަމާގެ މަސައްކަތް އެމްޑަބްލިއުއެސްސީން ވަނީ ނިންމައި ފެނަކަ އާއި ވަނީ ހަވާލުކޮށްފައެެވެ. އަދި މިހާރު ފެނަކައިން ނަރުދަމާގެ ހިދްމަތް ދިނުމަށް އަންނަނީ ތައްޔާރުވަމުންނެވެ.