ކުރިން އެމްޑީޕީ މެމްބަރެއްގެ ގޮތުގައި ހުރެގެން އެ ޕާޓީގެ އައްޑޫ ދާއިރާގެ ނައިބް ރައީސް ކަމަށް 2011 ވަނަ އަހަރު ކުރިމަތިލައި ނާކާމިޔާބްވި ހުސައިން މިރުސާދު ފީޕީއެމް އަށް ރޭ ސޮއިކޮށްފި އެވެ.
އޭނާ އެ ޕާޓީ އަށް ސޮއި ކުރީ ޕާޓީ އަށް މެމްބަރުން އިތުރު ކުރަން ރޭ ފޭދޫ ޕީޕީއެމް ޖަގަހައިގައި ބޭއްވި ރަސްމިއްޔާތެއްގަ އެވެ. މިރުސާދުގެ އިތުރުން ވެސް ރޭ ބައެއް މީހުން ޕީޕީއެމް އަށް ސޮއިކޮށްފައިވެ އެވެ.
މިރުސާދު ބުނީ އޭނާ ޕީޕީއެމް އަށް ސޮއި ކުރީ އެ ޕާޓީއަކީ ޒުވާނުންނަށް ފުރުސަތު ހުޅުވިފައި އޮތް ޕާޓީއަކަށްވާތީ އާއި މި އަހަރުގެ ރިޔާސީ އިންތިހާބް ކާމިޔާބް ކުރާނެ ޕާޓީއަކީ ވެސް ޕީޕީއެމް ކަމަށް ގަބޫލް ކުރެވޭތީ ކަމަށެވެ.
ކުރިން އެމްޑީޕީގެ ހަރަކާތްތަކުގައި މިރުސާދު ބައިވެރިވި ނަމަވެސް ފަހުން އޭނާ ވަނީ އައްޑޫގައި އެ ޕާޓީން ހިންގާ ހަރަކާތްތަކާ ވަރަށް ބޮޑަށް ދުރުވެފަ އެވެ.
މިރުސާދުއަކީ ފްރީލާންސް ލިއުންތެރިއެއްގެ ގޮތުގައި "އައްޑޫ ލައިވް" އަށް ކޮލަމާއި ވާހަކަ އާއި ސިޔާސީ ހަބަރުތައް ވެސް ލިޔެ ދެމުން އަންނަ ޒުވާނެކެވެ،
މިރުސާދު ވަނީ 2008 ވަނަ އަހަރު ކުރީގެ ރައީސް މުހައްމަދު ނަޝީދު އިންތިހާބަށް ކެމްޕޭން ކުރައްްވަމުން ގެންދެވި ދުވަސްވަރު، ނަޝީދުގެ ކެމްޕޭން މެނޭޖަރު އަދި ފަހުން ނަޝީދުގެ ޕްރެސް ސެކްރެޓަރީގެ މަގާމު އަދާ ކުރެއްވި މުހައްމަދު ޒުހެއިރު (ޖުހާ) އިސްކޮށް ހުންނަވައިގެން އައްޑޫގައި ނެރުނު "އަށްޑަން" ނޫސް ހުއްޓާލަންދެން އެ ނޫހުގައި ވެސް މަސައްކަތްކޮށްފަ އެވެ.