ފުރަތަމަ ފަހަރަށް ކުޑަކުއްޖަކަށް ކޮރޯނާ ވައިރަސް ޖެހިފައިވާ ކަމަށް ޗައިނާގެ އޮފިޝަލުން ބުނެފިއެވެ.
ޗައިނާ މީޑިއާތަކުން ރިޕޯޓުކޮށްފައިވާ ގޮތުގައި މިއަދު ބެއިޖިން އިން ފެނުނު ފަސް މީހުންގެ ތެރޭގައި 9 މަހުގެ ތުއްތު ކުއްޖަކު ހިމެނެއެވެ. މިއީ މިހާތަނަށް ކުޑަ ކުއްޖެއްގެ ގައިން މި ބަލި ފެނުނު ފުރަތަމަ ފަހަރެވެ.
ޗައިނާ ހެލްތު ކަމިޝަނުން ބުނީ މި ބަލި ފެތުރޭ ގޮތަށް ބަލާއިރު ބަލި ކޮންޓްރޯލް ކުރުމަކީ ބޮޑު ގޮންޖެހުމެއް ކަމަށެވެ.
މި ބަލީގައި މިހާތަނަށް 56 މީހަކު މަރުވެފައިވާ އިރު 2082 މީހެއްގެ ގައިން ބަލި ވަނީ ފެނިފައެވެ. މީގެ އިތުރުން ބަލި ޖެހިފައިވާ މީހުން ސިންގަޕޫރު، މެލޭޝިއާ، ތައިވާން، ތައިލެންޑު އަދި އެމެރިކާ، އޮސްޓްރޭލިއާ ފަދަ ގައުމުތަކުން ވަނީ ފެނިފައެވެ.
މި ބަލި ފެތުރޭ ބާރުމިނަށް ބަލާއިރު ބަލި ކޮންޓްރޯލް ކުރުމަކީ ދަތިކަމެއް ކަމަށް ސިއްހީ މާހިރުން ވަނީ ބުނެފައެވެ.