ނުރައްކާތެރި ވައިރަސްއެއްް ކަމަށްވާ ކޮރޯނާ ވައިރަސް ޗައިނާގައި ހަލުވި ކަމާއި އެކު ފެތުރެމުންދާތީ އެގައުމުން އަންނަ މީހުންނަށް ލަންކާ އަދި ޕިލިޕީންސުން ވިސާ ދިނުން ހުއްޓާލައިފިއެވެ.
ލަންކާއިން ޗައިނާ ފަތުރުވެރިންނަށް އޮން އެރައިވަލް ވިސާ ދިނުން ހުއްޓާލީ އެގައުމުން އިއްޔެ ކްރޯނާ ވައިރަސް ޖެހިފައިވާ މީހަކު ފެނުމާއި ގުޅިގެންނެވެ.
ލަންކާއިން ކޮރޯނާ ވައިރަސް ހުރި މީހަކު ފެނިފައިވާއިރު އެމީހާއަކީ ގްރޫޕަކާއި އެކު ޗައިނާއަށް އެތެރެވި ފަތުރުވެރިއެއްކަމަށް އެގައުމުން މައުލޫމާތު ދެއެވެ. އެމީހާ ފެނިފައިވަނީ ލަންކާގައި ހުއްޓާ ހުންއައިސްގެން ޑޮކްޓަރަށް ދެއްކައި އެޑްމިޓް ކުރި ފަހުން ކަމަށް ލަންކާ ނޫސްތަކުން ބުނެއެވެ. މިކަމާއި ގުޅިގެން އެގައުމުން އަންނަނީ އެމީހުން ދަތުރުކުރި ތަންތަނާއި، ހޮޓަލްގެ މައުލޫމާތު ހޯދަމުންއެވެ.
ޕިލިޕީންސުން ޗައިނާ މީހުންނަށް އޮން އެރައިވަލް ވިސާ ދިނުން މެދުކަނޑާލި އިރު އަދި މިހާތަނަށް އެގައުމުން ބަލި ޖެހިފައި ހުރި މީހަކު ނުފެނެއެވެ.
މިހާތަނަށް މި ބަލީގައި 106 މީހަކު މަރުވެފައިވާ އިރު ބަލި ޖެހިފައިވާ މީހުންގެ އަދަދު 4565 އަށް އަރައެވެ. މި ބަލި އެންމެ ހަލުވި ކަމާއި އެކު ފެތުރެމުން އަންނަނީ ޗައިނާގެ ވޫހާންގައެވެ.