ހަލުވި ކަމާއެކު މިހާރު ފެތުރެމުން އަންނަ ކޮރޯނާ ވައިރަސްއާ ގުޅިގެން ފަތުރުވެރިން ރާއްޖެ އައުމަށް ހަދާފައިވާ 5000 އަށްވުރެ ގިނަ ބުކިން ކެންސަލްކޮށްފިއެވެ.
މިދިޔަ އަންގާރަ ދުވަހާ ހަމައަށް ވައިރަސްއާ ގުޅިގެން 2،000 އަށް ވުރެ ގިނަ ބުކިން ކެންސަލްކޮށްފައިވެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ޓޫރިޒަމް މިނިސްޓަރު އަލީ ވަހީދު ވިދާޅުވީ ބުކިން ކެންސަލޭޝަންގެ އަދަދު މިހާރު ދެގުނަ އަށް އިތުރުވެފައިވާ ކަމަށާއި އެގޮތުން މިނިސްޓްރީ އަށް ރިޕޯޓުކޮށްފައިވާ އަދަދު 5،556 އަށް އަރާފައިވާ ކަމަށެވެ.
"އޭގެ ތެރޭގައި ޗައިނާގެ 3،693. އޭގެއިތުރުން އިޓަލީިގެ 397. ޖަރުމަންގެ 187 ޔޫކޭގެ 162. ކީ ޓޮޕް މާކެޓްތަކުން ވެސް ކެންސަލޭޝަންސް އެބައާދޭ" މިނިސްޓަރު ވިދާޅުވިއެވެ.
ސަރުކާރުން މިއަދު ވަނީ ކޮރޯނާ ވައިރަހުގެ ސަބަބުން ޗައިނާ އިން ސީދާ ރާއްޖެ އަށް ފްލައިޓުތައް އައުން ވެސް މިވަގުތަށް މެދުކަނޑާލަން ނިންމާފައެވެ.
އަލީ ވަހީދު ވިދާޅުވީ ޗައިނާއިން ރާއްޖެއަށް އަންނަ ސީދާ ފްލައިޓްތައް މިވަގުތަށް މަނާކުރަން ނިންމީ ޓޫރިޒަމް ދާއިރާގެ ވިޔަފާރިވެރިންނާ ވެސް އެކުގައި މަޝްވަރާ ކުރެއްވުމަށް ފަހު އެ ފަރާތްތަކުގެ ރުހުން އޮވެގެން ކަމަށެވެ.
އަދި މި ނިންމުން ނިންމުމުގެ ކުރިން ރާއްޖެ އެތެރެވި ޗައިނާ ފަތުރުވެރިން ވެސް ވަރަށް ރަނގަޅަށް ސްކްރީން ކުރެވުނު ކަމަށާއި މި ބަލި ޖެހިފައިވާ މީހަކު ނެތް ކަމަށްވެސް އަލީ ވަހީދު ވިދާޅުވިއެވެ.
މީގެއިތުރުން، މިނިންމުން ނިންމިއިރު ޖުމުލަ 950 އަށްވުރެ ގިނަ ފަތުރުވެރިން މޯލްޑިވިއަނުން އެކަނިވެސް ޗައިނާއިން ރާއްޖެ އަންނަން ހަމަޖެހިފައި އޮތްކަމަށާއި މި ހުރިހާ އެންމެންގެ ދަތުރުވެސް މިހާރު ކެންސަލްވެފައިވާ ކަމަށް ޓޫރިޒަމް މިނިސްޓަރ ވިދާޅުވިއެވެ.
ކޮރޯނާ ވައިރަހުގައި މިހާތަނަށް ޗައިނާގެ 170 މީހުން މަރުވެފައިވާއިރު މި ބައްޔަށް މިހާތަނަށް ޗައިނާގެ 7811 މީހުން ވަނީ ޕޮޒިޓިވް ވެފައެވެ. އޭގެތެރެއިން 1370 ހާލު ސީރިއަސް ކަމަށް ކަމާބެހޭ ފަރާތްތަކުން ހާމަކުރެއެވެ.