ހަލުވިކަމާއެކު މިހާރު ފެތުރެމުން އަންނަ ކޮރޯނާ ވައިރަސްގައި މަރުވި މީހުންގެ އަދަދު 200 އަށްވުރެ މައްޗަށް އަރައިފިއެވެ.
ޗައިނާގެ ހެލްތް ކޮމިޝަނުން ބުނިގޮތުގައި ފާއިތުވި 24 ގަޑިއިރުތެރޭ މި ބަލި އެންމެ ބޮޑަށް ފެތުރެމުންދާ ޗައިނާގެ ހުބެއި ޕްރޮވިންސުން ވަނީ 42 މީހުން މަރުވެފައެވެ. އެއާއެކު މި ބަލީގައި ޗައިނާ އިން މަރުވި މީހުންގެ ޖުމްލަ މިހާރު ވަނީ 213 އަށް އަރާފައެވެ.
މީގެއިތުރުން މިދިޔަ 24 ގަަޑިއިރުތެރޭ ހުބެއި ޕްރޮވިންސުން މި ބަލި 1،220 މީހުންނަށް ޖެހިފައިވާއިރު، ޗައިނާ އިން މި ބަލި ޖެހުނު މީހުންގެ އަދަދު މިހާރު ވަނީ 9000 އަށް ވުރެ މައްޗަށް އަރާފައެވެ.
ކޮރޯނާ ވައިރަސް ފެތުރެމުންދާއިރު ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ އިން ރޭ ވަނީ ސިއްހީ ކުއްލި ނުރައްކަލުގެ ހާލަތު މުޅި ދުނިޔެ އަށް އިއުލާންކޮށްފައެވެ.
ޑަބްލިއުއެޗްއޯގެ ޑިރެކްޓަރު ޖެނެރަލް ޓެޑްރޯސް އަދަނޮން ވިދާޅުވީ ބަލިކަށި ސިއްހީ ނިޒާމު ހުރި ގައުމުތަކަށް މި ބަލި ފެތުރިއްޖެނަމަ އޭގެ ސަބަބުން ކުރާނެ ގެއްލުން އަންދާޒާ ވެސް ކުރަން ދަތި ކަމަށެވެ.
"މިއީ އެފަދަ ގައުމުތަކަށް އެހީވާންވީ ވަގުތު. މި ހުރިހާ ސަބަބުތަކާ ހުރެ، އަހަރެން މި އިއުލާން ކުރަނީ މުޅި ދުނިޔެ އަށް ސިއްހީ ކުއްލި ނުރައްކަލުގެ ހާލަތު" އޭނާ ވިދާޅުވިއެވެ.
މިދިޔަ މަހުގެ ފަހުކޮޅު ޗައިނާގެ ވޫހާން ސިޓީން މި ބަލި ޖެހިފައިވާ މީހުން ފެންނަން ފެށިއިރު، ޗައިނާ ފިޔަވައި އެހެން ގައުމުތަކުން ވެސް މި ބަލި ޖެހިފައިވާ މީހުން އަންނަނީ ފެންނަމުންނެވެ.
މީގެއިތުރުން ޗައިނާ އަށް ދަތުރުކޮށްފައިނުވާ މީހުންގެ ތެރެއިން އަށް މީހަކަށް ވެސް މި ބަލި މިހާތަނަށް ޖެހިފައިވެއެވެ. އެ މީހުން ފެނިފައިވަނީ ޖަރުމަނު، ޖަޕާން، ވިއެޓްނާމް އަދި އެމެރިކާ އިންނެވެ.
މިއީ ސިއްހީ ކުއްލި ނުރައްކަލުގެ ހާލަތެއް ޑަބްލިއުއެޗްއޯ އިން އިއުލާންކުރި ފަސްވަނަ ފަހަރެވެ. މީގެކުރިން ޑަބްލިއުއެޗްއޯ އިން އެމެޖެންސީ އިއުލާންކުރީ ސްވައިން ފްލޫ (2009) އާއި ޒިކާ (2016) އާއި ޕޯލިއޯގެ (2014) އިތުރުން އެބޯލާއާ (2014 އަދި 2019) ގުޅިގެންނެވެ.