ކޮރޯނާ ވައިރަހާ ގުޅިގެން އިޓަލީ އާއި ޗައިނާއާ ދެމެދު ކުރަމުން އައި ވައިގެ ދަތުރުތައް މެދުކަނޑާލައިފިއެވެ.
މިފަދަ ނިންމުމެއް ނިންމާފައިމިވަނީ ކޮރޯނާ ވައިރަސް ޖެހިފައިވާ ޗައިނާގެ ދެ ފަތުރުވެރިއަކު އިއްޔެ އިޓަލީން ފެނިފައިވާ ދަނޑިވަޅެއްގައެވެ. އެ ދެ މީހުންނަށް މިހާރު ދަނީ އިޓަލީގެ ވެރިރަށް ރޯމްގެ ހޮސްޕިޓަލުގައި ގާއިމުކޮށްފައިވާ އައިސޮލޭޝަން ފެސިލިޓީގައި ފަރުވާ ދެމުންނެވެ.
އިއްޔެ ބޭއްވި ނޫސްވެރިންގެ ބައްދަލުވުމެއްގައި އިޓަލީގެ ބޮޑުވަޒީރު ކޮންޓޭ ވިދާޅުވީ ޗައިނާއާ ދެމެދު ވައިގެ ދަތުރުތައް މެދުކަނޑާލަން ނިންމީ ވައިރަސް އިތުރަށް ފެތުރުމުގެ ފުރުސަތު ނުދިނުމުގެ ގޮތުން ކަމަށެވެ.
"އަހަންނަށް ހީވަނީ މިއީ ޔޫރަޕްގެ ގައުމުތަކުގެ ތެރެއިން ވެސް މިފަދަ ފިޔަވަޅެއް އެޅި ފުރަތަމަ ގައުމު ހެން" ކޮންޓޭ ވިދާޅުވިއެވެ.
ޔޫރަޕްގެ ބައެއް އެހެން ގައުމުތަކުގެ އެއާލައިންތަކުން ވެސް ޗައިނާ އަށް ދަތުރުކުރުން މެދުކަނޑާލާފައިވާއިރު، ޗައިނާގައި ތިބި ބައެއް ގައުމުތަކުން ރައްޔިތުން އަނބުރާ ގެނައުމުގެ މަސައްކަތް ވެސް މިހާރު އަންނަނީ ކުރަމުންނެވެ.
ކޮރޯނާ ވައިރަސްގައި މިހާތަނަށް ޗައިނާ އިން 213 މީހުން މަރުވެފައިވާއިރު، މި ވައިރަސް ޖެހިފައިވާ ޗައިނާ މީހުންގެ އަދަދު މިހާރު ވަނީ 9000 އަށްވުރެ މައްޗަށް އަރާފައެވެ.
ކޮރޯނާ ވައިރަސް ފެތުރެމުންދާއިރު ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ އިން ރޭ ވަނީ ސިއްހީ ކުއްލި ނުރައްކަލުގެ ހާލަތު މުޅި ދުނިޔެ އަށް އިއުލާންކޮށްފައެވެ.