މިއަދަކީ ރާއްޖޭގެ ޑިމްކޮރަސީގެ ރީތި ނަމޫނާ ފެނިގެންދާނެ ދުވަހެއް ކަމަށް އެމްޑީޕީގެ ރައީސް އަދި މަޖްލިސްގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިފަދައިން ވިދާޅުވީ މިއަދު އެޕާޓީން ކުރިއަށްގެންދާ ލޯކަލް ކައުންސިލް އިންތިހާބުގައި ވާދަކުރާނެ ކެންޑިޑޭޓުން ހޮވުމަށް ބާއްވާ ޕާޓީގެ އެތެރޭގެ ޕްރައިމަރީއަށް އިޝާރާތް ކުރައްވައެވެ.
މިއަދުގެ ޕްރައިމަރީގައި 909 ކެންޑިޑޭޓުން ވާދަކުރާއިރު މި ކެންޑިޑޭޓުންނަށް ވޯޓުލުމަށް 169 ވޯޓު ފޮށި ވަނީ ބަހައްޓާފައެވެ.
ނަޝީދު ވިދާޅުވީ މިއަދަކީ މިއަދަކީ ރާއްޖޭގެ އެންމެ ބޮޑު ސިޔާސީ ހަރަކާތް ހިންގާނެ ދުވަސް ކަމަށާއި، ޑިމްކޮރަސީގެ ރިވެތި އުސޫލު ފެނިގެންދާނެ ކަމަށެވެ.
އެމްޑީޕީން ބުނީ މިއަދުގެ ޕްރައިމަރީއަށް ފުރިހަމައަށް ތައްޔާރުވެފައިވާ ކަމަށާއި، އެތައް ހާސް ބަޔަކު ނިކުމެ ވޯޓުލާނެކަމަށެވެ.
ލޯކަލް ކައުންސިލް އިންތިހާބު ބޭއްވުމަށް ހަމަޖެހިފައިވަނީ އެޕްރީލް 5 ވަނަ ދުވަހުއެވެ. އެމްޑީޕީ ފިޔަވައި އެހެން ޕާޓީއަކުން މިހާތަނަށް އިންތިހާބުތަކަށް ކެންޑިޑޭޓުން ނެރުމަށް ޕްރައިމަރީ ބާއްވާފައި ނުވެއެވެ. އެމްޑީޕީގެ އެތެރޭގެ އިންތިހާބުތަކަކީ ވަރަށް ފޯރިއާއި އެކު ވާދަވެރިކަމާއި އެކު ހިންގޭ ސިޔާސީ ހަރަކާތެކެވެ.