ވައިރަސް އާއި ގުޅިގެން ޗައިނާ އިން ސީދާ ރާއްޖެ އަށް ފްލައިޓުތައް އައުން ސަރުކާރުން މަނާކޮށްފައިވާއިރު މިއަދު ރާއްޖެ އަންނަނީ ޗައިނާ ފަތުރުވެރިން އެގައުމަށް ގެންދިއުމަށް އަންނަ ޗާޓަރު ފްލައިޓުތަކެއް ކަމަށް ފޮރިން މިނިސްޓްރީން ބުނެފިއެވެ.
އެނގިފައިވާ ގޮތުގައި ފަތުރުވެރިން އެގައުމަށް ގެންދިއުމަށް މިއަދު ޗައިނާގެ ހަތަރު ސަރަހައްދަކުން ރާއްޖެއަށް ދަތުރު ކުރުމަށްވަނީ ޝެޑިއުލްކޮށްފައެވެ. އެގޮތުން ޗައިނާގެ ބެއިޖިން، ޝެންހާއީ، ގުއާންޒޯ އަދި ހެންޒޫއިން ރާއްޖެ އަށް ދަތުރުކުރާނެއެވެ.
ފޮރިން މިނިސްޓްރީން ބުނީ ރާއްޖޭގައި މިވަގުތު އައިސް ތިބ ޗައިނާ ފަތުރުވެރިން ފުރުވާލުމުގެ މަސައްކަތް ޓޫރިޒަމް މިނިސްޓްރީ އާއި ކަމާއި ގުޅުން ހުރި ފަރާތްތަކާއި ގުޅިގެން ކުރަމުން އަންނަ ކަމަށެވެ.
ފޮރިން މިނިސްޓަރ އަބްދުﷲ ޝާހިދު އިއްޔެ ވިދާޅުވީ މި ވައިރަހުގެ ސަބަބުން ސަރުކާރުން މުހިއްމު ދެ ނިންމުމެއް ނިންމަވާފައިވާ ކަމަށާއި އެގޮތުން ފުރަތަމަ ނިންމުމަކީ ޗައިނާ އިން ސީދާ ރާއްޖެ އަށް ދަތުރުކުރާ ފްލައިޓުތައް މިވަގުތަށް މެދުކަނޑާލުމުގެ ނިންމުން ކަމަށެވެ.
"ސީދާ ޗައިނާ އިން ރާއްޖެ އަށް އަންނަ ފްލައިޓުތައް މެދުކަނޑާލަން ސަރުކާރުން ވަނީ ނިންމަވާފައި" ޝާހިދު ވިދާޅުވިއެވެ.
އަދި ދެވަނަ ނިންމުމަކީ ކޮރޯނާ ވައިރަސްއާ ހިމަބިހިފަދަ ނުރައްކާތެރި ބަލިތައް ފެތުރުން މިދުވަސްވަރު ޢާންމުވެފައިވާތީ، މިފަދަ ނުރައްކާތެރި ބަލިތަކުން ސަލާމަތްކޮށް ދެއްވުން އެދި ރާއްޖޭގެ ހުރިހާ މިސްކިތެއްގައި މިރޭގެ މަޣުރިބް ނަމާދުން ފެށިގެން ގުނޫތު ކިޔަން ޖެހޭ ގޮތަށް ހަމަޖެއްސުން ކަމަށްވެސް ޝާހިދު ވިދާޅުވިއެވެ.
މީގެއިތުރުން ވައިރަސް ފެތުރެމުންދާ ގައުމުތަކަށް ދިވެހިން ކޮންމެހެން ކުރަންޖެހޭ ދަތުރުތައް ނޫނީ މިވަގުތަށް ނުކުރުމަށް ވެސް ސަރުކާރުން އިލްތިމާސްކުރާ ކަމަށް ޝާހިދު ވިދާޅުވިއެވެ.
ޓޫރިޒަމް މިނިސްޓަރު އަލީ ވަހީދު މި ނޫސް ކޮންފަރެންސްގައި ވިދާޅުވީ ޗައިނާއިން ރާއްޖެއަށް އަންނަ ސީދާ ފްލައިޓްތައް މިވަގުތަށް މަނާކުރަން ނިންމީ ޓޫރިޒަމް ދާއިރާގެ ވިޔަފާރިވެރިންނާ ވެސް އެކުގައި މަޝްވަރާ ކުރެއްވުމަށް ފަހު އެ ފަރާތްތަކުގެ ރުހުން އޮވެގެން ކަމަށެވެ.
އަދި މި ނިންމުން ނިންމުމުގެ ކުރިން ރާއްޖެ އެތެރެވި ޗައިނާ ފަތުރުވެރިން ވެސް ވަރަށް ރަނގަޅަށް ސްކްރީން ކުރެވުނު ކަމަށާއި މި ބަލި ޖެހިފައިވާ މީހަކު ނެތް ކަމަށްވެސް އަލީ ވަހީދު ވިދާޅުވިއެވެ.
މިނިންމުން ނިންމިއިރު ޖުމުލަ 950 އަށްވުރެ ގިނަ ފަތުރުވެރިން މޯލްޑިވިއަނުން އެކަނިވެސް ޗައިނާއިން ރާއްޖެ އަންނަން ހަމަޖެހިފައި އޮތްކަމަށާއި މި ހުރިހާ އެންމެންގެ ދަތުރުވެސް މިހާރު ކެންސަލްވެފައިވާ ކަމަށް ޓޫރިޒަމް މިނިސްޓަރ ވިދާޅުވިއެވެ.