ސ. ހިތަދޫ ސްކޫލްގައި ޕްރިންސިޕަލަަށް ރ. ހުޅުދުއްފާރަށް ނިސްބަތްވާ މުހައްމަދު ޝުކުރީ ހަމަޖައްސައިފި އެވެ.
ހިތަދޫ ސްކޫލްގައި ޕްރިންސިޕަލަކު ނެތި ގިނަ ދުވަސްތަކެއް ވެފައި ވަނިކޮށް ޝުކުރީ އާ އެ މަގާމު ހަވާލު ކުރުމާ ގުޅިގެން އަންނަ ހަފުތާ ތެރޭގައި ޝުކުރީ ހިތަދޫ ސްކޫލްގައި މަސައްކަތް ކުރައްވަން ފަށްޓަވާނެ އެވެ. އޭނާ ވަނީ މިކަން "އައްޑޫ ލައިވް" އަށް ވެސް މިއަދު ކަށަވަރުކޮސް ދެއްވައިފަ އެވެ.
ޔުނިވަސިޓީ އޮފް މެލޭޝިއާ އިން ގްރެޖްއޭޓް ވެވަޑައިގެންފައިވާ ޝުކުރީ އެންމެ ފަހުން ހުންނެވީ ރ. އަލިފުށީ ޕްރިންސިޕަލްކަމުގެ ގެ މަގާމުގަ އެވެ.
މިދިޔަ އަހަރު ހިތަދޫ ސްކޫލްގައި ޕްރިންސިޕަލްްގެ މަގާމުގައި ހުންނެވި އަލީ ޚާލިދު ބެލެނިވެރިންގެ ޕްރެޝަރާ ގުޅިގެން މަގާމުން އިސްތިއުފާ ދެއްވުމުން އެ ސްކޫލަށް ދާއިމީ ޕްރިންސިޕަލަކު މިހާތަނަށް އޮތީ ހަމަނުޖެހި އެވެ.
އަލީ ހާލިދު މަގާމުން އިސްތިއުފާ ދެއްވީ އެ ސްކޫލްގެ އަންހެން މުވައްޒަފަކާ އެކު "ބަދުއަހުލާގީ" އަމަލުތަކެއް ހިންގި ކަމަށް ބުނާ މައްސަލެއް ފެންމަތިވުމާ ގުޅިގެންނެވެ.
ގްރޭޑް 1-10 އަށް ކިޔަވައިދޭ ހިތަދޫ ސްކޫލްގައި މިހާތަނަށް ވަގުތީ ޕްރިންސިޕަލެއްގެ ގޮތުގައި މަސައްކަތްް ކުރައްވަމުން ގެންދަވަނީ އައްޑޫ ހައި ސްކޫލްގެ ޕްރިންސިޕަލް އިބްރާހިމް ނަދީމެވެ.