އިއްޔެ ބޭއްވި ލޯކަލް ކައުންސިލް އިންތިހާބުގެ އެމްޑީޕީ ޕްރައިމަރީގައި ވާދަކުރި މާލެ ސިޓީ، އައްޑޫ ސިޓީ އަދި ފުވައްމުލަކު ސިޓީގެ މޭޔަރުންނަށް ބޮޑު ނާކާމިޔާބީއަކާއި ކުރިމަތިލާން ޖެހިވަޑައިގެންފިއެވެ.
މިހާތަނަށް ލިބިފައިވާ ވަގުތީ ނަތީޖާއަށް ބަލާއިރު އައްޑޫ ސިޓީގެ މޭޔަރ ޕްރައިމަރީ ކާމިޔާބު ކުރެއްވީ ކުރީގެ ހިތަދޫ ދާއިރާގެ މެމްބަރު އަލީ ނިޒާރުއެވެ. ލާމަރުކަޒީ ގާނޫނު އުފަންވީއްސުރެ އައްޑޫގެ މޭޔަރުކަން ކުރައްވަމުން އަންނަނީ ހިތަދޫ އުތުރު ދާއިރާއިން އިންތިހާބުވެފައިވާ އަބްދުﷲ ސޯދިގު (ސޯބެ)އެވެ. ސޯބެ ވަނީ ތިން ދައުރު އައްޑޫގެ މޭޔަރުކަން ކުރައްވާފައެވެ. އަދި 2009 ވަނަ އަހަރު އަތޮޅު ކައުންސިލަރުކަން ވެސް ކުރައްވާފައެވެ.
މާލެ ސިޓީއަށް ބަލާއިރު ފާއިތުވި ދެ ދައުރު މޭޔަރުކަން ކުރެއްވި ޝިފާ މުހައްމަދު ބަލި ކުރައްވައި، ޕްރައިމަރީ ކާމިޔާބު ކުރެއްވީ އެމްޑީޕީގެ ސެކްރެޓަރީ ޖެނެރަލް އަނަސް އަބްދުއް ސައްތާރެވެ. "މާލެއަށް ޝިފާ" ނަމުގައި ކެމްޕެއިން ކުރެއްވި ޝިފާ ވަނީ ބޮޑުތަނުން ބަލިވެފައެވެ.
ފުވައްމުލަކު ސިޓީއަށް ބަލާއިރު ފާއިތުވި ދެ ދައުރު މޭޔަރުކަން ކުރެއްވި ފަލާހުވެސް ވަނީ ކަޓާފައެވެ. ފަލާހު އާއި ވާދަކޮށް ޕްރައިމަރީ ކާމިޔާބު ކުރެއްވީ އިސްމާއިލް ރަފީގު (އިއްސޭ)އެވެ.
ލޯކަލް ކައުންސިލް އިންތިހާބު ބޭއްވުމަށް ހަމަޖެހިފައިވަނީ އެޕްރީލް 5 ވަނަ ދުވަހުއެވެ. މި އިންތިހާބު ބޮޑުތަނުން ކާމިޔާބު ކޮށްދިނުމަށް ރައީސް ސޯލިހު ވަނީ އެދިވަޑައިގެންފައެވެ.