އަރިދަފުސް ރޯގާ ޖެހިފައިވާ ކޮންމެ މީހަކީ ކޮރޯނާ ޖެހިފައިވާ މީހެއް ނޫން ކަމަށް އައިޖީއެމްއެޗުގެ ޑރ. މުހައްމަދު އަލީ ވިދާޅުވެއްޖެއެވެ.
ކޮރޯނާވައިރަސްއަށް ރާއްޖެއިން ތައްޔާރުވެފައި އޮތް މިންވަރު ހާމަކުރުމަށް ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވަހާކަ ދައްކަވަމުން ޑޮކްޓަރ މުހައްމަދު އަލީ ވިދާޅުވީ، ކޮރޯނާ ވައިރަސްގައި ފެންނަ އަލާމާތްތަކަކީ އަދައިގެ ރޯގާއެއްގައި ފެންނަ އަލާމާތްތަކެއް ކަމަށެވެ. ބަލިން ރައްކާތެރިވުމަށްޓަކައި ކުރެވިދާނެ ވަރަށް ލުއި ކަންތައްތަކެއް އެބަހުރިކަމަށް ވެސް ޑރ. މުހައްމަދު އަލީގެ ވާހަކަފުޅުގައި ފާހަގަކުރެއްވިއެވެ. ޑރ. ވިދާޅުވީ، ރޯގާއެއް ޖެހިފައިވާ ކޮންމެ މީހަކީ ކޮރޯނާވައިރަސްގެ ބަލި ޖެހިފައިވާ މީހެއް ނޫންކަމަށާއި، ވައިރަސް އަށް ޝައްކު ކުރެވޭ މީހެއްގެ ގޮތުގައި ބެލެވޭނީ ޗައިނާއަށް ދަތުރުކޮށްފައިވާ މީހެއްކަމަށެވެ.
މި ބައްދަލުވުމުގައި ވާހަކަަދައްކަވަމުން ޑރ. އިބްރާހީމް އަފްޒަލް ވިދާޅުވީ ކޮރޯނާ ވައިރަސް ހުރި މީހަކާއި ކޮންޓެކްޓްވި ކަމަށް ބެލެވެނީ، 15 މިނެޓު ވަންދެން އެ ބަލި ޖެހިފައިވާ މީހަކާއި އެކު ހުރުމުން ކަމަށެވެ. ޑރ. އަފްޒަލް ވިދާޅުވީ، ކޮރޯނާ ވައިރަސް ޖެހުމުގެ ފުރުސަތު އޮންނަނީ، ބަލި ޖެހިފައިވާ މީހާ ވަށައިގެން ތިން ފޫޓާއި ހަމައަށް ކަމަށެވެ. އެ ވައިރަސް ފެތުރެނީ، ކެއްސާ ކިނބިހި އަޅާ އިރު ކުޅުގެ ޒަރީއާއިން ކަމަށް އޭނާ ފާހަގަކުރެއްވިއެވެ.
އެހެންކަމުން ބަލި މީހާ އާއި ތިން ފޫޓާއި ހަމައަށް ގާތް ނުވާނަމަ އެ ބަލި ޖެހުމުގެ ފުރުސަތު ވަރަށް ބޮޑަށް ކުޑަވާނެ ކަމަށް ޑރ. އަފްޒަލް ވިދާޅުވިއެވެ. އަދި ވިދާޅުވީ އިމާރާތެއްގެ ތެރޭގައި ހުރި މީހެއްގެ ކިބައިންވެސް ކޮރޯނާ ވައިރަސް ފެތުރުމަކީ ނާދިރު ކަމެއް ކަމަށެވެ. އޭނާ ވިދާޅުވީ އެފަދަ ހާލަތަކަށް މީހަކު ގޮސްދާނެތީ ވެސް ވަރަށް ގިނަ މީހުން ބިރު ގަންނަމުންދާ ކަމަށާއި އެހެންނަމަވެސް އެއީ މާބޮޑަށް ބިރުގަންނަން ޖެހޭ ވަރުގެ ކަމެއް ނޫން ކަމަށް އޭނާ ވިދާޅުވިއެވެ.
" އޭނަގެ ވަށައިގެން 3 ފޫޓުގެ ދުރުމިނެއްގައި ބަލި ފެތުރުމުގެ ފުރުސަތު މި އިންނަނީ، ބައެއް ކަހަލަ ބަލިތައް ހުންނާނެ ވައިގެ ތެރޭގައި ޖަރާސީމު ހިފާފައި ވައިގެ ތެރޭގައި ފްލޯޓު ވާ ކަހަލަ ބަލިތައް، އެކަމަކު މީ އޭގެ ބައްޔެއް ނޫން، މިބަލީގައި މި ހުންނަނީ ބަލި ޖެހޭ މީހާ ކެއްސާ ކިނބިހި އަޅާއިރު ބުރައިގެންދާ ތިކިތައް ނޫނީ ޖަރާސީމު ދާނެ، ސްޕްރެޑް ވާނެ ކަމަށް އަޅުގަނޑުމެންނަށް ކަށަވަރުވާ ދާއިރާއަކީ 3 ފޫޓް، އެހެންވީމާ 3 ފޫޓާ ހަމައަށް ގާތް ނުވާނަމަ އެއްވެސް އެހެން މީހަކަށް އޭގެ ދުރުގަ ތިބޭ އެއްވެސް މީހަކަށް ގެއްލުމެއް ނުވާނެ" ޑރ. އަފްޒަލް ވިދާޅުވިއެވެ.
ރޭ ހެލްތު މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހެލްތު މިނިސްޓަރު އަބްދުﷲ އަމީން ވިދާޅުވީ ބަލި ޖެހިފައިވާ އިތުރު މީހަކު ނުފެންނަ ކަމަށާއި އެހެންނަމަވެސް ބައްޔަށް ޝައްކު ކުރެވޭ ދެ މީހަކު އިތުރަށް މޮނީޓާ ކުރަމުން އަންނަ ކަމަށެވެ. އަދި ވިދާޅުވީ އެމީހުންގެ ޓެސްޓުތައް ވެސް ހަދަމުން އަންނަ ކަމަށާއި އެމީހުން ތިބީ ކ. ފުނަދޫގައި ކަރަންޓީނު ކޮށްފައި ކަމަށެވެ.