ވޫހާންގައި ތިބި 7 ދިވެހިން އިންޑިއާގެ ދިއްލީއަށް ގެނައުމުގެ މަސައްކަތް ފަށާފައިވާކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްްޖެއެވެ.
މީގެ ކުޑައިރުކޮޅެއް ކުރިން ފޮރިން މިނިސްޓަރ އަބްދުﷲ ޝާހިދު ކުރެއްވި ޓްވީޓެއްގައި ވިދާޅުވީ ވޫހާންގައި ތިބި 7 ދިވެހިން އިންޑިއާގެ ދިއްލީއަށް ގެންނަނީ އެއާ އިންޑިއާގެ ހާއްސަ ފްލައިޓެއްގައި ކަމަށެވެ. އަދި އެ މަސައްކަތް މިހާރު ފެށިފައިވާ ކަމަށް ޝާހިދު ވިދާޅުވިއެވެ.
ޝާހިދު އިތުރަށް ވިދާޅުވީ އެ 7 މީހުން ދިއްލީއަށް ގެނެސް ކަރަންޓީނު ކުރުމަށް ނިންމާފައިވާ ކަމަށެވެ.
ރައީސް އޮފީހުގައި މީގެ ތިން ދުވަސް ކުރިން ބޭއްވި ނޫސް ކޮންފަރެންސެއްގައި ފޮރިން މިނިސްޓަރ ޝާހިދު ވިދާޅުވީ ވޫހާންގައި ތިބި 9 ދިވެހިންގެ ތެރެއިން 7 ދިވެހިން ރާއްޖެ އަންނަން ބޭނުންވާ ކަމަށާއި އެކަން އެކުވެރި ގައުމަކާއި ގުޅިގެން ކުރަމުން އަންނަ ކަމަށެވެ. ނަމަވެސް އެއީ ކޮން ގައުމެއްކަން ޝާހިދު އޭރު ވިދާޅެއް ނުވެއެވެ.
ވޫހާން އަކީ ކޮރޯނާ ވައިރަސް އެންމެ ގަދައަށް ފެތުރެމުން އަންނަ ސިޓީއެވެ. މި ސިޓީ ވަނީ ޗައިނާ ސަރުކާރުން ކަރަންޓީނުކޮށްފައެވެ. އެހެންވެ މި ސިޓީއަށް ވަދެ ނިކުމެވެނީ ޗައިނާ ސަރުކާރުގެ ހާއްސަ ހުއްދަ އަކާއި ގުޅިގެންނެވެ.
ޝާހިދު ވަނީ ވޫހާންގައި ތިބި 7 ދިވެހިން ގެނައުމުގައި އިންޑިއާ ސަރުކާރުން ވެދެއްވަމުންދާ އެހީތެރިކަމަށްޓަކައި ބޮޑުވަޒީރު ނަރެންދުރަ މޯދީ އާއި އިންޑިއާއިން ރާއްޖެ ކަނޑައަޅުއްވާފައިވާ ސަފީރަށް ޝުކުރު ދަންނަވާފައެވެ.