އައްޑޫގައި އިކޯ ޓޫރިޒަމް ކުރިއެރުވުމަށް އިންޑިއާއިން ދިވެހި ސަރުކާރަށް 2.49 މިލިއަން ޑޮލަރު (38 މިލިއަން ރުފިޔާ)ގެ އެހީ ދިނުމަށް އެއްބަސްވެއްޖެއެވެ.
ފޮރިން މިނިސްޓްރީގައި މީގެ ކުޑައިރުކޮޅެއް ކުރިން ބޭއްވި ރަސްމިއްޔާތެއްގައި މި އެއްބަސްވުމުގައި އިންޑިއާގެ ފަރާތުން ސޮއި ކުރެއްވީ އިންޑިއާއިން ދިވެހިރާއްޖެއަށް ކަނޑައަޅުއްވާފައިހުންނަވާ ހައި ކޮމިޝަނަރ ސަންޖޭ ސުދީރްއެވެ. އަދި ދިވެހި ސަރުކާރާއި އައްޑު ސިޓީ ކައުންސިލްގެ ފަރާތުން ސޮއިކުރެއްވީ ފޮރިން މިނިސްޓަރ އަބްދުﷲ ޝާހިދްއެވެ.
މި އެއްބަސްވުމުގެ ދަށުން އައްޑޫގެ ފަސް ސަރަހައްދެއް އިކޯ ޓޫރިޒަމަށް ތަރައްޤީ ކުރެވިގެންދާނެއެވެ. މި އެއްބަސްވުމާއި ގުޅޭ ގޮތުން ދިވެހި ސަރުކާރުން ބުނީ އައްޑޫ ޓޫރިޒަމް ޒޯންގެ ސަބަބުން އައްޑޫގެ ރައްޔިތުންނަށް ވަޒީފާގެ އިތުރު ފުރުސަތުތައް ތަނަވަސްވެ އިކޯ ޓޫރިޒަމް އިތުރަށް ކުރިއަރައިގެންދާނެ ކަމަށް ލަފާ ކުރެވޭކަމަށެވެ.
އިންޑިއާއިން ވަނީ އައްޑޫގައި ތިން ގޭ ދޮށު މަސް ފެކްޓަރީ އެޅުމަށްވެސް އެހީތެރިވުމަށް ނިންމާފައެވެ.