އިންޑިއާގެ އެހީގައި ހއ. ހޯރަފުށީގައި ފެން ޕްލާންޓެއް ގާއިމް ކުރުމަށް ދިވެހި ސަރުކާރާއި އެކު އެއްބަސްވުމެއްގައި ސޮއިކޮށްފިއެވެ.
ފޮރިން މިނިސްޓްރީގައި މިއަދު ބޭއްވި ރަސްމިއްޔާތެއްގައި މި އެއްބަސްވުމުގައި އިންޑިއާގެ ފަރާތުން ސޮއި ކުރެއްވީ އިންޑިއާއިން ދިވެހިރާއްޖެއަށް ކަނޑައަޅުއްވާފައިހުންނަވާ ހައި ކޮމިޝަނަރ ސަންޖޭ ސުދީރްއެވެ. ދިވެހި ސަރުކާރުގެ ފަރާތުން އެއްބަސްވުމުގައި ސޮއި ކުރެއްވީ ފޮރިން މިނިސްޓަރ އަބްދުﷲ ޝާހިދުއެވެ.
އިންޑިއާއިން ވަނީ މި ޕްލާންޓު ގާއިމް ކުރުމަށް 8 މިލިއަން ދިވެހި ރުފިޔާގެ އެހީ ދިނުމަށް ނިންމާފައެވެ. މިއީ އިންޑިއާ ސަރުކާރުގެ 'ހައި އިމްޕެކްޓް ކޮމިއުނިޓީ ޑެވެލޮޕްމެންޓް' (އެޗް.އައި.ސީ.ޑީ.ޕީ) ގެ ދަށުން ކުރިއަށްގެންދެވޭ މަޝްރޫއުތަކެކެވެ.
މިއަދުގެ ރަސްމިއްޔާތުގައި ދިވެހި ސަރުކާރާއި އިންޑިއާ އާއި ދެމެދު ވަނީ އައްޑޫގެ ފަސް ސަރަހައްދެއް އިކޯ ޓޫރިޒަމަށް ތަރައްޤީ ކުރުމަށް ނިންމައި އެހީ ދިނުމުގެ އެއްބަސްވުމުގައި ސޮއިކޮށްފައެވެ.