ގުރުގާ ގޯދިއްޔާ ރޯދަ ފުޓްސަލްގައި ރޭ ކުޅުނު ތިންމެޗްގެ ތެރެއިން ފުރަތަމަ މެޗް ފްރެންޑްސް ކްލަބް ކާމިޔާބް ކޮށް ދެވަނަ މެޗް ޒިލޮޓް އަދި ފަހު މެޗް ޓިއެފްޓީ ވޮރިއާސްއިން ކާމިޔާބްކޮށްފިއެވެ.
ރޭގެ ފުރަތަމަ މެޗްގައި ފްރެންޑްސް ކްލަބާއި ރިއަލް މަރަދޫ ބައްދަލުކުރި މެޗް ފްރެންޑްސް ކްލަބުން ކާމިޔާބް ކުރީ 5-2 ލަނޑުންނެވެ.
ފްރެންޑްސް ކްލަބަށް ލަނޑުޖަހައި ދިނީ އަބްދުﷲ ހަނިފް އާއި މުހައްމަދު ރިއްފަތުއެވެ. އަބްދުﷲ ހަނީފް 2 ލަނޑު ޖެހި އިރު މުހައްމަދު ރިއްފަތު ވަނީ ތިން ލަނޑު ޖަހައި މެޗްގެ މޮޅުކުޅުންތެރިއާ ހޯދާފައެވެ.
ރިއަލް މަރަދޫއަށް ލަނޑު ޖަހައި ދިނީ މުރުތަޟާ އަދުނާން އާއި މުހައްމަދު ޝަބީން އާދަމްއެވެ. ރިއަކް މަރަދޫއަށް ލިބުނު ޕެނަލްޓީ ވަނީ މިސްވެފައެވެ.
ރޭގެ ދެވަނަ މެޗް ޒިލޮޓް ކާމިޔާބު ކުރީ ޔުނިއަން ސްޕޯޓްސް އާއި ބައްދަލުކޮށް 6-2 ލަނޑުންނެވެ. ޒިލޮޓް އަށް ލަނޑު ޖަހައިދީފައިވަނީ މުހައްމަދު އިމްރާން އާއި އަހުމަދު ވިސާލް އާއި ރިޒުވާން އާއި އަޒްލަމްއެވެ. މީގެ ތެރެއިން އިމްރާން އާއި އަހުމަދު ވިސާލް ވަނީ ކޮންމެ ކުޅުން ތެރިއަކު ދެ ގޯލް ސްކޯ ކޮށްފައެވެ.
ޔުނިއަން ސްޕޯޓްސްއަށް ލަނޑު ޖަހައި ދިނީ އަހުމަދު އާސިމް އާއި މުހައްމަދު ހަސަން ހަބީބްއެވެ. މެޗްގެ މޮޅުކުޅުންތެރިއަކަށް ހޮވިފައިވަނީ ޒިލޮޓްގެ އަހުމަދު ވިސާލްއެވެ.
ޒިލޮޓްވަނީ މިހާތަނަށް ކުޅުނު ދެމެޗުން މޮޅުވެ ތާވަލްގެ އެއްވަނާގައެވެ.
ރޭގެ ފަހުމެޗްގައި ޓީއެފްޓީ ވޮރިއާސް އާއި އެފްސީ ޒެފިއާ ބައްދަލު ކުރި މެޗް 2-3 ލަނޑުން ކާމިޔާބް ކުރީ ޓީއެފްޓީ ވެރިއާސް އެވެ. މެޗްގައި ޓީއެފްޓީއަށް ލަނޑު ޖަހައި ދިނީ އަހުމަދު އިރުފާލް އާއި އަހުމަދު ސިމްހާނުއެވެ. އަރުފާްލް ވަނީ 2 ގޯލްޖަހައި މެޗްގެ މޮޅު ކުޅުންތެރިއާ ހޯދާފައެވެ.
ޒެފިއާގެ ދެލަނޑުވެސް ޖަހައި ދިނީ ހަސަން އިރުފާންއެވެ.
މިހާތަނަށް ޒެފިއާ ކުޅުނު ދެ މެޗުންވެސް ވަނީ ބަލިވެފައެވެ. ފުރަތަމަ މެޗްގައި ޝަންގްރިއްލާ އާއި ވާދަކޮށް ޒެފިއާ ބަލިވެފައިވަނީ 3-1 ލަނޑުންނެވެ.
މިރޭ ވެސް މި މުބާރާތުގެ 3 މެޗް ކުޅޭނެއެވެ. ފުރަތަމަ މެޗްގައި ބައްދަލު ކުރާނީ މަލްޓީ ޖީނިއަސް އާއި ރެސްކިއުއެވެ.
ދެވަނަ މެޗްގައި ބައްދަލުކުރާނީ އެފްވައިސީ އާއި އޯޕީއެޗް ސްޕޯޓްސްއެވެ. އަދި ފަހު މެޗްގައި ބައްދަލުކުރާނީ ހަބޭސް އާއި މާކަރީ ޔުނައިޓެޑްއެވެ.