ޗައިނާގައި ހަލުވި ކަމާއި އެކު ފެތުރެމުން އަންނަ ކްރޯނާ ވައިރަސް އާއި ގުޅިގެން ރާއްޖޭގެ ފަތުރުވެރިކަމަށް ވަނީ ވަރަށް ބޮޑަށް ހިޔަނި އެޅިފައިވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރިޔާސީ ބަޔާން އިއްވަމުން ރައީސް ވިދާޅުވީ ނިމިގެންދިޔަ އަހަރު ސަރުކާރުން ފަތުރުވެރިކަމަށް ކަނޑައެޅި ލަނޑުދަނޑި ހާސިލް ކުރެވިފައިވާކަމަށެވެ.
" އަޅުގަނޑުމެންގެ އަމާޒަކީ މިދިޔަ އަހަރުގެ ތެރޭގައި 1.5 މިލިއަން ފަތުރުވެރިން ރާއްޖެ ގެނައުން ކަމަށްވިޔަސް، މިދިޔަ އަހަރުގެ ނިޔަލަށް 1.7 މިލިއަން ފަތުރުވެރިން ރާއްޖެއަށް ޒިޔާރަތްކުރި. މިއީ އޭގެ ކުރީ އަހަރާ އަޅައިބަލާއިރު، 14.7 އިންސައްތައިގެ އިތުރުވުމެއް." ރައީސް ސޯލިހު ވިދާޅުވިއެވެ.
ރައީސް ވިދާޅުވީ ސަރުކާރުގެ މިއަހަރުގެ އަމާޒަކީ، 2021 ވަނަ އަހަރު ނިމުމުގެ ކުރިން 2.15 މިލިއަން ފަތުރުވެރިން ރާއްޖެ ގެނައުން ކަމަށެވެ. ނަމަވެސް ޗައިނާ ގައި ފެތުރެމުން އަންނަ ކްރޯނާ ވައިރަސް އާއި ގުޅިގެން ފަތުރުވެރިކަމަށް ބޮޑު ހިޔަނި އެޅިފައިވާ ކަމަށެވެ.
"ނުރައްކާތެރިކަން ޢާންމުވި ދުވަހުން ފެށިގެން، އިއްޔެގެ ނިޔަލަށް، ފަތުރުވެރިކަމުގެ 13287 ބުކިން ކެންސަލްވެއްޖެ، މިކަމުން ލިބޭ ގެއްލުން ފޫބެއްދުމަށްޓަކައި، ފަތުރުވެރިކަން އިޝްތިހާރުކުރުމަށް، މިއަހަރުގެ ތެރޭގައި ވަރަށް ގިނަ މަސައްކަތްތަކެއް ކުރަންޖެހޭނެ ކަމަށް އަޅުގަނޑު ދެކެން" ރައީސް ވިދާޅުވިއެވެ.
ރައިސް މިގޮތަށް ވިދާޅުވިއިރު އިއްޔެ ސަރުކާރުން ވަނީ ޗައިނާ މީހުން ރާއްޖެ އިތުރުވުން މަނާކޮށްފައެވެ.