ރާއްޖޭގެ އުތުރުގެ ބައެއް އަތޮޅުތަކުގެ ބިންގަނޑަށް ލޮޅުމެއް އައިސްފައިވަނީ އެ ސަރަހައްދަށް އައި ކުޑަ ބިން ހެލުމެއްގައި ކަމަށް ބިންހެލުންތައް ދިރާސާކުރާ ޔޫއެސް ޖިއޮލޮޖިކަލް ސާވޭއިން ބުނެފިއެވެ.
ބިންހެލުންތައް ދިރާސާކުރާ ޔޫއެސް ޖިއޮލޮޖިކަލް ސާވޭ އިން ބުނެފައިވާ ގޮތުގައި ބިންހެލުން އައީ ހއ. ދިއްދޫއާ 47.2 މޭލު ބޭރުން ކަނޑުގެ ބިމުގެ 10 ކިލޯމީޓަރު ފުނުންނެވެ. ބިންހެލުމުގެ ބާރުމިނަކީ 4.5 މެގްނިޓިއުޑެވެ.
ރާއްޖޭގެ މޫސުމާއި ބެހޭ އިދާރާއިން ބުނީ ރޭ ދަންވަރު އުތުރުގެ ބައެއް އަތޮޅުތަކުން ބިންގަނޑަށް ލޮޅުމެއް އައި ކަމުގެ ރިޕޯޓުތައް ވަނީ ލިބިފައިވާ ކަމަށެވެ.
އެގޮތުން ބެލިބެލުމުގައި ހަނިމާދޫގައި ގާއިމްކޮށްފައިވާ ބިންހެލުން ރިކޯޑު ކުރާ މީޓަރަށް ރާއްޖޭގެ ގަނޑިން ބުދަ ދުވަހުގެރޭ ދަންވަރު 1:47 ހާއިރު ލޮޅުމެއްގެ އަސަރުކޮށްފައިވާކަން ރިކޯޑްކުރެވިފައިވާ ކަމަށް މެޓުން އޮފީހުން ބުންޏެވެ.
ނަމަވެސް މީގެ ސަބަބުން ރާއްޖެއަށް ނުރައްކަލެއް ކުރިމަތިވާނެ ކަމަކަށް ލަފާ ނުކުރެވޭ ކަމަށް ވެސް މެޓް އޮފީހުން ބުންޏެވެ.