މާލެ އަކީ ވަކި ބައެއްގެ ތަރިކައެއް ނޫންކަމަށާއި، ނަސްލީ ތަފާތުކުރުން ބޮޑު ކުރާނަމަ މާލެ ހިފަން ޖެހިދާނެ ކަމަށް ވިލިނގިލީ ދާއިރާގެ މެމްބަރު ސައުދު ހުސެއިން ވިދާޅުވެއްޖެއެވެ.
ސައުދު މިފަދައިން ވިދާޅުވީ، މާލޭގެ ރައްޔިތުން ދިރިއުޅޭނެ ފްލެޓެއް ބިމެއް ލިބެން ނެތުމާއިއެކު އެ ރައްޔިތުންނަކީ ފަލަސްޠީނު ރައްުޔިތުން ފަދަ ބައެއް ކަމަށް ސިފަ ކުރައްވައި ރޭ ރާއްޖެޓީވީ "ފަލަ ސުރުހީ"ގައި ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް (އަނދުން ހުސެއިން) ދެއްކި ވާހަކަތަކަށް ރައްދު ދެއްވަމުންނެވެ.
ސައުދު ވިދާޅުވީ މާލެ އަކީ ވަކިބައެއްގެ ތަރިކައެއް ނޫންކަމަށާއި ގްރޭޓާ މާލެ ތަރައްޤީ ކުރުމަށް ނެގި ލޯނުތަކާއި ކުރަމުންދާ ޚަރަދަކީ ދިވެހި ރައްޔިތުންގެ އެސެޓް ކަމަށެވެ.
"ރާއްޖެތެރޭ މީހުންގެ ފައިސާ އިން މާލެ ތަރައްޤީކޮށްފައި އެރައްޔިތުންނަށް ދަތިކޮށް ފުރައްސާރަ ކުރާނަމަ ދެކުނު ރައްޔިތުން އަނެއްކާވެސް ސުވާދީބް ސަރުކާރެއް އުފައްދަން ޖެހިދާނެ." ސައުދު ވިދާޅުވިއެވެ.
ސައުދު ވިދާޅުވީ މާލެ ދަފްތަރުގައި ޖެހިފައިވާ އެންމެހާ ރަށު ރައްޔިތުން ރަށު ރަޖިސްޓްރީއަށް ބަދަލުވުމަށް ގޮވާލާ ކަމަށެވެ.
އަނދުން ހުސެއިންގެ މި ވާހަކަތަކަށް ދާންދޫ ދާއިރާގެ މެމްބަރު ޔައުގޫބް އަބްދުﷲ ވެސް ވަނީ ރައްދު ދެއްވާފައެވެ. ޔައުގޫބު ވިދާޅުވީ އަތޮޅު ތެރޭ ރައްޔިތުން އިޒްރޭލްގެ ޒައިނުސްޓުންނާއި އެއްފަދަ ކުރުމުން ލަދުވެތިވެ ހިތާމަ ކުރާކަމަށެވެ.
އަނދުން ހުސެއިންއަށް އަތޮޅުތަކުގެ ރައްޔިތުން އަންނަނީ ހޫނު ރައްދުދެމުންނެވެ.