ދައުލަތުގެ ހަރަދު ކުޑަކުރުމަށް ސިޔާސީ މަގާމު އުފެއްދުން ހުއްޓާލަން ޖެހޭކަމަށް މަޑުއްވަރީ ދާއިރާގެ މެމްބަރު އަދި ކުރީގެ ޑިފެންސް މިނިސްޓަރ އާދަމް ޝަރީފު އުމަރު ވިދާޅުވެއްޖެއެވެ.
އާދަމް ޝަރީފު މިފަދައިން ވިދާޅުވީ ކޮރޯނާ ވައިރަސް އާއި ގުޅިގެން ރާއްޖޭގެ އިގްތިސާދު ދަށައް ދާނެކަމަށް ލަފާކޮށް ފިނޭންސް މިނިސްޓްރީން ދައުލަތުގެ ހަރަދު ކުޑަކުރުމަށް އަންގާފައިވަނިކޮށް ރައީސް އޮފީހަށާއި، ބައެއް ވުޒާރާތަކަށް ސިޔާސީ ވެރިން އައްޔަން ކުރުމާއި ގުޅިގެން ކުރެއްވި ޓްވީޓެއްގައެވެ.
ސަރުކާރުން ވަނީ ދައުލަތުގެ ހަރަދުޔ ކުޑަކުރުމުގެ ގޮތުން އިތުރު ގަޑި ނެހެދުމަށް ސިވިލް ސާވިސްއަށް އަންގާފައެވެ. އަދި ސަރުކާރު ހިއްސާވާ ކުންފުނިތަކުގެ ހަރަދު ކުޑަކުރުމަށްވެސް ފިނޭންސް މިނިސްޓަރ ވަނީ އަންގާފައެވެ.
ޝަރީފު ކުރެެއްވި ޓްވީޓެއްގައި ވިދާޅުވީ ސަރުކާރުގައި އިހްލާސްތެރިކަމެއް އޮތްނަމަ އިތުރުގަޑި މަދުކުރުމަށް އެންގުމުގެ ބަދަލުގައި ސިޔާސީ މަގާމުތައް މަދުކޮށް، ސަރުކާރުގެ ދަތުރުތައް މަދުކުރީސްއެވެ.
ޝަރީފު މިފަދައިން ވިދާޅުވިއިރު އިއްޔެ ވަނީ ރައީސް އޮފީހުގެ އަންޑަރ ސެކްރެޓަރީގެ މަގާމަށް ޑރ. މަލިކު އައްޔަން ކުރައްވާފައެވެ. އަދި މިއަދު ވަނީ މަޝްހޫރު ސޯޝަލް މީޑިއާ އެކްޓިވިސްޓް ޠޮއްޔިބު ޝަހީމް، ޓޫރިޒަމް މިނިސްޓްރީގެ ސީނިއާ އެގްޒެކެޓިވް ޑިރެކްޓަރުގެ މަގާމަށް އައްޔަން ކުރައްވާފައެވެ.