އަތޮޅުތެރޭ ރައްޔިތުންނާއި މާލެ ތަފާތު ކުރާނަމަ ސުވާދީވް އުފައްދަން ޖެހިދާނެ ކަމުގެ އިންޒާރު ރައްޔިތުންގެ މަޖިލީހުގެ ވިލިނގިލީ ދާއިރާގެ މެމްބަރު ސައުދު ހުސެއިން ދެއްވައިފިއެވެ.
ސައުދު މިފަދައިން ވިދާޅުވީ، މާލޭގެ ރައްޔިތުން ދިރިއުޅޭނެ ފްލެޓެއް ބިމެއް ލިބެން ނެތުމާއިއެކު އެ ރައްޔިތުންނަކީ ފަލަސްޠީނު ރައްުޔިތުން ފަދަ ބައެއް ކަމަށް ސިފަ ކުރައްވައި ރޭ ރާއްޖެޓީވީ "ފަލަ ސުރުހީ"ގައި ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް (އަނދުން ހުސެއިން) ދެއްކި ވާހަކަތަކަށް ރައްދު ދެއްވަމުންނެވެ.
ސައުދު ވިދާޅުވީ ރާއްޖެތެރޭ މީހުންގެ ފައިސާ އިން މާލެ ތަރައްޤީކޮށްފައި އެރައްޔިތުންނަށް ދަތިކޮށް ފުރައްސާރަ ކުރާނަމަ ދެކުނު ރައްޔިތުން އަނެއްކާވެސް ސުވާދީބް ސަރުކާރެއް އުފައްދަން ޖެހިދާނެކަމަށެވެ.
ރައީސް ނާސިރުގެ ވެރިކަމުގައި ދެކުނު ހަތަރު އަތޮޅުގެ ރައްޔިތުން ގުޅިގެން ވަނީ މީގެ 54 އަހަރު ކުރިން ސުވާދީވްގެ ނަމުގައި ސަރުކާރެއް އުފައްދާފައެވެ. އެދުވަސްވަރު ދެކުނު މީހުން ގުޅިގެން ވަކި ސަރުކާރެއް ހެދީ މާލެ ސަރުކާރުން ދެކުނުގެ ރައްޔިތުންނާއި މެދުބޮޑުތަނުން އިހްމާލުވެގެންނެވެ.
އަފީފު ދީދީ އިސްވެ ހުންނަވައި އޭރު އުފެއްދި ސުވާދީވް ސަރުކާރުގައި "ޕީޕަލްސް ބޭންކު އޮފް އައްޑޫ" ނަމުގައި ރާއްޖޭގެ ފުރަތަމަ ބޭންކު ހުޅުވައި ހިދްމަތް ދިނެވެ. ދެކުނުގެ ބައެއް މީހުން ބުނާ ގޮތުގައި އެދުވަސްވަރަކީ ފަހުގެ ތާރީހެއްގައި ދެކުނުގެ ރައްޔިތުން އެންމެ ފުދިގެން އުޅުނު ދުވަސްވަރެވެ.