ކުރުގާ ގޯދިއްޔާ ފުޓްސަލްގައި ރޭ އެފްއާރްޓީ ބޮޑު ތަފާތަކުން ބަލިކޮށް ގްރޫޕް ސީގެ ތާވަލްގެ އެއްވަނާގައި ޝަންގްރިއްލާ ހަމަޖެހިލައިފި އެވެ.
މޮޅު ކުޅުންތެރިން ގިނަ ޝަންގްރިއްލާއިން އެފްއާރްޓީ ބަލިކުރީ 8-1 ލަނޑުންނެވެ. ޝަންގްރިއްލާއަށް ލަނޑު ޖަހާ ދީފައިވަނީ މުހައްމަދު ތިލްމީޒު (ބިއްޑޭ) އާއި އަހުމަދު ޝާފިއު (ޝާޓީ)ގެ އިތުރުން ޖުނާހު އާއި އަހުމަދު ރަޝީދު އަދި ވިޝާންއެވެ.
ޝާޓީ ދެ ގޯލް ޖެހި އިރު ބިއްޑޭ ވަނީ 3 ގޯލް ޖަހައި މޮޅު ކުޅުންތެރިއާ ހޯދާފަ އެވެ.
ރޭގެ ދެވަނަ މެޗްގައި ޒިލޯންއާއި ޔަންގް ވަންސް ބައްދަލު ކުރި މެޗް 4-0 ލަނޑުން ކާމިޔާބް ކުރީ ޒިލޯންއެވެ. ޒިލޯން އަށް ލަނޑު ޖަހައި ދިނީ ހުސެއިން ނަސީރު އާއި ހުސެއިން މުފްލިހް އަދި އަބްދޫﷲ ޝައްފާން އާއި ހުސެއިން އާބްދްއެވެ.
އާބިދު ލަނޑު ޖެހީ މެޗް ނިމެމުން ދަނިކޮށް ލިބުނު ޕެނަލްޓީއަކުންނެވެ.
ޒިލޯންގެ މުހައްމަދު ޒާހިރު އަށް ވަނީ ރީދޫ ކަޑް ދައްކާފައެވެ. މެޗްގެ މޮޅު ކުޅުންތެރިއަކަށް ހޮވިފައިވަނީ ޒިލޯންގެ ހުސެއިން ނަސީރު އެވެ.
ރޭގެ ފަހު މެޗްގައި އެފްސީ ރެސްޕެކްޓް އާއި ފްރަންޑްސް ކްލަބް ބައްދަލުކުރި މެޗް 4-2 ލަނޑުން ކާމިޔާބް ކުރީ ފްރެންޑްސް ކްލަބެވެ.
މެޗްގެ ފުރަތަމަ ލަނޑު ލިބުނު ޕެނަލްޓީއަކުން ކާމިޔާބް ކުރީ ފްރެންޑްސް ކްލަބްގެ މުހައްމަދު ރިއްފަތުއެވެ. ރިއްފަތު ލަނޑު ޖަހާފައި ވަނިކޮށް ރެސްޕެކްޓްގެ ރާއިޒް (ރާޑޯ) ލަނޑެއް ޖަހައި ނަތީޖާ ހަމަހަމަ ކުރި އެވެ. ނަމަވެސް އިރުކޮޅެއްގެ ތެރޭގައި ފްރެންޑްސް ކްލަބްގެ މުބީން އަހުމަދު ރަޝީދުވަނީ ލަނޑެއް ޖަހައި ލީޑް ނަގައި ދީފަ އެވެ.
ފްރެންޑްސް ކްލަބްގެ ތިން ވަނަ ލަނޑާއި 4 ވަނަ ލަނޑުވެސް ޖެހީ ރިއްފަތުއެވެ. ރެސްޕެކްޓްގެ ދެވަނަ ގޯލް ޖެހީ ހަސަން މިފްރާހްއެވެ. ފްރެންޑްސް ކްލަބްގެ ރިއްފަތު އާއި އަހުމަދު ހާފިޒްއަށް ވަނީ ރީދޫ ކާޑް ދައްކާފައެވެ. މެޗްގެ މޮޅު ކުޅުންތެރިއަކީ ފްރެންޑްސް ކްލަބްގެ ރިއްފަތު އެވެ.
މިރޭ ކުޅޭ ފުރަތަމަ މެޗްގައި ބައްދަލު ކުރާނީ ކްލަބް މަރަދޫ އާއި ޔުނިއަން ސްޕޯޓްސްއެވެ. ދެވަނަ މެޗްގައި ކުޅޭނީ އަބާނީ އާއި ޓިއެފްޓީ ވެރިއާސް އެވެ. އަދި ފަހުމެޗްގައި ކުޅޭނީ ކެންޑާ އެފްސީ އާއި ރެސްކިއު އެވެ.