ދައުލަތަށް ގެެއްލުންވާ ގޮތަށް އެއްވެސް އިދާރާއަކުން އެގްރިމެންޓު ކޮށްގެން ނުވާނެކަމަށް މަރަދޫ ދާއިރާގެ މެމްބަރު އިބްރާހިމް ޝަރީފު ވިދާޅުވެއްޖެއެވެ.
ޝަރީފު މިގޮތަށް ވިދާޅުވީ އެމްއޭސީއެލްއިން ހަދަމުން އަންނަ ސީޕްލޭން ޓާމިނަލްގެ މައްސަލާގައި ޓީއެމްއޭ އާއި ސަރުކާރާއި ދެމެދު ދެބަސްވުން އުފެދިފައިވަނިކޮށް ކުރެއްވި ޓްވީޓެއްގައެވެ.
އެމްއޭސީއެލްއިން ތަރައްޤީ ކުރަމުން އަންނަ ސީޕްލޭން ޓާމިނަލުން 5000 އަކަ މީޓަރުގެ ޖާގައެއް ޓީއެމްއޭއަށް ދެ އަހަރު ދުވަހަށް ދިނުމަށް ސަރުކާރުން ނިންމައި އެކުންފުންޏަށް އެންގުމުން އެކުންފުނިން ވަނީ އޭގެ ސަބަބުން ކުންފުންޏަށް ބޮޑު ގެއްލުމެއް ވާނެ ކަމަށް ބުނެފައެވެ. އަދި އެކުންފުންޏަށް ސިޓީއަކުން 19000 އަކަ މީޓަރުގެ ޖާގައެއް ދޭން އެމްއޭސީއެލްއިން ނިންމައި އަންގާފައިވާ އިރު އެޖާގަ ދިނުމަށް އެކުންފުނިން އަންނަނީ ވަކާލާތު ކުރަމުންނެވެ.
ޓީއެމްއޭ އާއި އެމްއޭސީއެލް އާއި ދެމެދު ދެބަސްވުން އުފެދިފައިވާއިރު އޭގެ ސަބަބުން ދައުލަތުން ބޮޑު ބަދަލެެއް ޓީއެމްއޭއަށް ދޭން ޖެހިދާނެކަމަށްވެސް ވަނީ ބެލެވިފައެވެ.
ޝަރީފު ވިދާޅުވީ ދައުލަތުގެ އިދާރާތަކުން އެއްބަސްވުމުގައި ސޮއި ކުރަންވާނީ އެގްރިމެންޓު ބާޠިލް ކުރަން ޖެހުނަސް ބަދަލުގެ ގޮތުގައި ދޭން ޖެހޭ މިންވަރު ބަޔާން ކުރުމަށްފަހު ކަމަށެވެ.
ސީޕްލޭން ޓާމިނަލް މައްސަލަ ހޫނުވެފައިވާ އިރު މަޖްލިސްގެ ރައީސް މުހައްމަދު ނަޝީދު ވިދާޅުވީ ސަރުކާރާއި ޓީއެމްއޭއަށް ފައިދާ ހުރި އެއްބަސްވުމަކަށް އައުން ވަރަށް ބޭނުންތެރި ކަމަށެވެ. އަދި މައްސަލައަށް ގޮތެއް ނުހޯދިއްޖެ ނަމަ ރަންވޭ ހުޅުވުން ލަސްވުމުގެ އިތުރުން ޓީއެމްއޭއަށް ބަދަލު ދޭން ޖެހިދާނެ ކަމަށެވެ.
ނަޝީދު ވިދާޅުވީ އެމްއޭސީއެލް އާއި ޓީއެމްއޭގެ މުއާމަލާތްތައް ހިންގާފައި ހުރީ ކުރީގެ ރައީސް އަބްދުﷲ ޔާމީންގެ ސަރުކާރުގައި ކަމަށާއި ގޯސް ހެދި މީހުންގެ މައްޗަށް އަވަސް ތަހުގީގެއް ފަށަން ޖެހޭ ކަމަށެވެ.