ގާނޫނުތައް ހަދަން ވާނީ ރައްޔިތުންގެ ފައިދާއަށް ކަމަށާއި ރައްޔިތުންނަށް ގެއްލުމަކަށް ނޫންކަމަށް ރައްޔިތުންގެ މަޖިލީހުގެ ކުރީގެ ހިތަދޫ ދެކުނު ދާއިރާގެ މެމްބަރު އަދި އެމްޑީޕީ ޓިކެޓުގައި އައްޑޫ މޭޔަރުކަމަށް ވާދަކުރައްވާ އަލީ ނިޒާރު ވިދާޅުވެއްޖެއެވެ.
ނިޒާރު މިފަދައިން ވިދާޅުވީ ވަޒީފާގެ ޕްރޮބޭޝަން މުއްދަތު 6 މަހަށް އިތުރު ކުރުމަށް ވަޒީފާ އާއި ބެހޭ ގާނޫނަށް ހުށަހެޅު އިސްލާހާއި ގުޅިގެން ކުރެއްވި ޓްވީޓެއްގައެވެ.
ނިޒާރު ވިދާޅުވީ ޕްރޮބޭޝަންގެ މުއްދަތު 6 މަސް ދުވަހަށް އިތުރުކޮށްފިނަ ރިސޯޓުތަކުގައި ގިނަ ވާނީ ވަގުތީ މުވައްޒަފުން ކަމަށެވެ. އަދި މުސާރަ އާއި އިނާޔަތެއް ނެތި ބަޔަކު ބަނދެވުނީ ކަމަށް ނިޒާރު ވިދާޅުވިއެވެ.
މިހާރު އަމަލު ކުރަމުންދާ ވަޒީފާ ބޭހޭ ގާނޫނުގައި ޕްރޮބޭޝަން މުއްދަތަކީ 3 މަސް ދުވަހެއެވެ.
މި ގާނޫނަށް ކެނދިކުޅުދޫ ދާއިރާގެ މެމްބަރު އަހުމަދު އީސާ ހުށަހަޅުއްވާފައިވާ އިސްލާހަކީ ވަޒީފާގެ ޕްރޮބޭޝަން މުއްދަތު ހަ މަސްދުވަހަށް ވުރެ ދިގު ނޫން މުއްދަތަކަށް ހެދުމަށެވެ.
އަދި ވަޒީފާގެ އެއްބަސްވުން ފެށޭ ތާރީހާއި، އުޖޫރަ ދެވޭ މިންގަނޑާއި އުޖޫރަ ހިސާބު ކުރެވޭނެ ގޮތާއި، އުޖޫރަ ދިނުމަށް ކަނޑައަޅާ މުއްދަތުތަކާއި، ޗުއްޓީ ލިބޭ ގޮތާއި، މުވައްޒަފުގެ އަހުލާގާއި ގުޅޭ ގޮތުން އޭނާއާ މެދު ފިޔަވަޅު އެޅިދާނެ އުސޫލުތައް ވަޒީފާގެ އެއްބަސްވުމުން އުނިކުރަން ވެސް ވަނީ އިސްލާހު ހުށަހަޅާފައެވެ.
މީގެއިތުރުން ބަލިވެގެން ސަލާމް ބުނުމުގެ މާއްދާ އަށް ވެސް އިސްލާހުތަކެއް ގެންނަން ވަނީ ހުށަހަޅާފައެވެ.
ގާނޫނުގައި މިހާރު ބުނެފައިވާ ގޮތުން ބަލީގެ ބާވަތާއި އެބަލީގެ ސަބަބުން މުވައްޒަފަކަށް މަސައްކަތަށް ނުނިކުމެވޭނެ މުއްދަތު ބަޔާންކޮށް، ރަޖިސްޓްރީކޮށްފައިވާ ސިއްހީ މަސައްކަތްތެރިއަކު ދޫކުރާ މެޑިކަލް ސެޓްފިކެޓެއް ވަޒީފާ އަށް ނިކުންނަ ދުވަހު ހުށަހެޅުމުން ނޫނީ އެ މުވައްޒަފަކަށް، ވިދިވިދިގެން ދެ ދުވަހަށް ވުރެ ދިގު ނޫން މުއްދަތަކަށް ސަލާމުގެ ޗުއްޓީ ދިނުން ލާޒިމު ވެގެން ނުވެއެވެ.
މި މާއްދާ އަށް ގެންނަން ހުށަހަޅާފައިވާ އިސްލާހުގައި ބުނެފައިވަނީ މެޑިކަލް ސެޓްފިކެޓް ވަޒީފާ އަށް ނިކުންނަ ދުވަހު ހުށަހެޅުމުން މެނުވީ، އެ މުވައްޒަފަކަށް ސަލާމުގެ ޗުއްޓީ ދިނުން، ވަޒީފާދޭ ފަރާތުގެ މައްޗަށް ލާޒިމު ވެގެން ނުވާ ކަމަށެވެ.