ކްލަބް މަރަދު އާއި ޔުނިއަން މެޗް އެއްވަރު

ކުރުގާ ގޯދިއްޔާ ފުޓްސަލްގެ ގްރޫޕް ބީ ގައި ކްލަބް މަރަދޫ އާއި ޔުނިއަން ސްޕޯޓްސްއިން ބައްދަލު ކުރި ފޯރިގަދަ މެޗް 5-5 ލަނޑުން އެއްވަރުވެއްޖެ އެވެ.

މެޗްގެ ފުރަތަމަ ލަނޑު ޔުނިއަން އަށް ޖަހައިދިނީ މުހައްމަދު ހަސަން ހަބީބް (ރައުލް)އެވެ. ކްލަބް މަރަދޫން އެއްވަރު ކުރި ލަނޑު ޖެހީ ލިބުނު ޕެނަލްޓީއަކުން ސުހެއިލް އެވެ.
ޔުނިއަންގެ ލަނޑުތައް ޖަހައިދީފައިވަނީ އިބްރާހިމް އާސިފް އާއި އަމީން އިބްރާހިމް އާއި މުހައްމަދު މާޒިމް އެވެ. ރައުލް ވަނީ 2 ގޯލް ޖަހާފަ އެވެ.

ކްލަބް މަރަދޫގެ ލަނޑުތައް ޖަހައި ދިނީ އަހުމަދު ރިމާޒް އާއި މުހައްމަދު ނިޝާން އާއި އިބްރާހިމް މުހައްމަދު އެވެ. ސުހެއިލް ވަނީ 2 ގޯލު ޖަހައި މެޗްގެ މޮޅު ކުޅުންތެރިއާ ހޯދާފައެވެ. މެޗްގައި ކްލަބް މަރަދޫގެ ރުޝާން އަހުމަދުއަށް ވަނީ ރީނދޫ ކާޑެއް ދައްކާފަ އެވެ.

ރޭގެ ދެވަނަ މެޗްގައި އަބާނީ އާއި ޓީއެފްޓީ ވޮރިއާސް ބައްދަލު ކުރި މެޗް 4-2 ލަނޑުން ކާމިޔާބް ކުރީ އަބާނީއެވެ.
މެޗްގެ ފުރަތަމަ ލަނޑު ޖެހީ ޓިއެފްޓީންނެވެ. އެލަނޑު ކާމިޔާބް ކޮށްދިނީ މުހައްމަދު ނިހާދު އެވެ. އަދި ދެވަނަ ލަނޑު ޖަހައި ލީޑު ނެގީވެސް ޓީއެފްޓީންނެވެ. މި ލަނޑު ކާމިޔާބް ކޮށްދިނީ އާދަމް ޒާހިރު އެވެ.

އަބާނީގެ ފުރަތަމަ ލަނޑު ޕެނަލްޓީއަކުން ކާމިޔާބް ކޮށްދިނީ މުހައްމަދު އަހުމަދުއެވެ. އަދި ދެވަނަ ލަނޑު ޖަހައިދިނީ މުހައްމަދު ޝިމާޒްއެވެ. ތިންވަނަ ލަނޑު އިޒްދިހާރު އަބްދުއް ސަމަދު ކާމިޔާބް ކޮށް ދިން އިރު ފަހު ލަނޑު ޖެހީ ނޫރު އިބްރާހިމްއެވެ. މެޗްގެ މޮޅު ކުޅުން ތެރިއަކީ ވެސް ނޫރު އިބްރާހިމް އެވެ.

ރޭގެ ފަހު މެޗްގައި ގްރޫޕް ޑީގެ ކެންޑާ އެފްސީ އާއި ރެސްކިއު ކުޅުނު މެޗް ނިމިފައިވަނީ 4-4 ލަނޑުން އެއްވަރުވެގެންނެވެ. މެޗްގެ ފުރަތަމަ ލަނޑު ޖެހީ ރެސްކިއުއިންނެވެ. މި ލަނޑު ޖެހީ އިބްރާހިމް އާސިފްއެ ވެ.

ރެސްކިއުގެ ބާކީ ހުރި ލަނޑުތައް ޖަހާދީފައިވަނީ ހުސެއިން ފައިސަލް އާއި އަލީ މަލާޝްއެވެ. ފައިސަލް ވަނީ ދެ ގޯލް ޖަހާފައެވެ.

ކެންޑާއަށް ލަނޑު ޖަހައި ދިނީ އަބްދުﷲ އިމްތިޔާޒް އާއި ހުސެއިން ލިރާރް އާއި ހުސެއިން ސައީދު އާއި އަލީ ޒުހެއިރުއެވެ. މޮޅު ކުޅުންތެރިއަކަށް ހޮވިފައިވަނީ ކެންޑާގެ އިމްތިޔާޒްއެވެ.

މިރޭ ވެސް މި މުބާރާތުގެ ތިން މެޗް ކުޅޭނެއެވެ. އެގޮތުން ފުރަތަމަ މެޗްގައި ބައްދަލު ކުރާނީ ގްރޫޕް އޭގެ ރިއަލް މަރަދޫ އާއި އޯޕީއެޗް ސްޕޯޓްސް އެވެ.
ދެވަނަ މެޗްގައި ބައްދަލުކުރާނީ ޒިލޮޓް އާއި މާކަރީ ޔުނައިޓެޑްއެވެ. އަދި ފަހު މެޗްގައި ބައްސަލު ކުރާނީ ޒެފިއާ އާއި އެފްއާރްޓީ އެވެ.