އަންނަ ލޯކައުންސިލް އިންތިހާބުގައި ޕީޕީއެމް ޓިކެޓުގައި ވާދަ ކުރައްވާނެ ކެންޑިޑޭޓަކަށް ކުރީގެ ވޮލީބޯލް އެސޯސިއޭޝަންގެ ރައީސް މުހައްމަދު ލަޠިފު ހަމަޖައްސައިފިއެވެ.
ޕީޕީއެމްގެ ކެންޑިޑޭޓަކަށް ލަޠީފު ހަމަޖެއްސިކަން އޭނާ ވަނީ ކަށަވަރުކޮށްދީފައެވެ. އަދި މިއަދު އޭނާގެ ފޯމު އިލެކްޝަނަށް ހުށަހަޅާނެ ކަމަށް ލަޠީފު ވަނީ ބުނެފައެވެ.
ލަޠީފު ޕީޕީއެމްގެ ޓިކެޓުގައި ވާދަކުރައްވާއިރު މީގެ ކުރިން އޭނާ ވަނީ 2014 ވަނަ އަހަރުގެ މަޖްލިސް އިންތިހާބުގައި ހިތަދޫ މެދު ދާއިރާއަށް ވާދަ ކުރުމަށް ޕީޕީއެމް ޕްރައިމަރީގައި ބައިވެރިވެ ބަލިވެފައެވެ. ލަޠީފަށް އެޕްރައިމަރީގައި ލިބުނީ 188 ވޯޓެވެ.
އިދިކޮޅު ޕީޕީއެމްއިން ލަޠީފު ނެރޭއިރު އެމްޑީޕީގެ ޓިކެޓުގައި މޭޔަރު ކަމަށް ވާދަކުރައްވަނީ ކުރީގެ ހިތަދޫ ދެކުނު ދާއިރާގެ މެމްބަރު އަލީ ނިޒާރުއެވެ. ނިޒާރު ވަނީ ޕްރައިމަރީގައި 4000 އަށް ވުރެ ގިނަ ވޯޓު ހޯއްދަވައި މިހާރުގެ މޭޔަރު އަބްދުﷲ ސޯދިގުގެ މައްޗަށް ކުރި ހޯދާފައެވެ.