މިދިޔަ އެޕްރީލް މަހު ލަންކާއަށް ދިން ބޮމުގެ ހަމަލާ އާއި ދިވެހިންނާއި އެއްވެސް ގުޅުމެއް އޮތް ކަމަށް މިހާތަނަށް ލަންކާ ސަރުކާރުން އަންގާފައި ނުވާކަމަށް މޯލްޑިވްސް ޕޮލިސް ސާވިސްއިން ބުނެފިއެވެ.
ލަންކާއަށް ދިން ހަމަލާ އާއި ގުޅިގެން އެގައުމުން ދިވެހި 4 މީހަކު ހައްޔަރުކޮށްފައިވާކަމަށް މީޑިއާގައި ރިޕޯޓު ކުރުމާއި ގުޅިގެން މިރޭ ފުލުހުން ނެރުނު ބަޔާނެއްގައި ބުނެފައިވަނީ ލަންކާގެ ކަމާއި ބެހޭ އިދާރާތަކުން ހާމަކޮށްފައިވާ މައުލޫމާތަށް ބަލާއިރު 20 ފެބްރުއަރީ 2020 ވަނަ ދުވަހު އެއްވެސް ދިވެއްސެއް ލަންކާއިން ހައްޔަރުކޮށްފައި ނުވެއެވެ.
ފުލުހުން ބުނީ 2019 އެޕްރީލް 21 ވަނަ ދުވަހު ލަންކާއަށް ދިން ޓެރަރިސްޓު ހަމަލާގައި އެއްވެސް ދިވެއްސެއްްގެ ބައިވެރިވުމެއް އޮތަކަން މިހާތަނަށް ލަންކާގެ އެއްވެސް ކަމާއި ބެހޭ އިދާރާއަކުން ފުލުހަށް ކަށަވަރުކޮށްދީފައި ނުވާ ކަމަށެވެ. އަދި ޓެރަރިޒަމާއި ދެކޮޅަށް ކުރަމުން އަންނަ މަަސައްކަތް ރާއްޖެ އަބަދުވެސް ބައިނަލްއަގްވާމީ ފެންވަރުގައި ކުރަން ޖެހޭ މަސައްކަތް ކުރާނެ ކަމަށެވެ.
ފުލުހުން މިގޮތަށް ބަޔާން ނެރުނު އިރު ލަންކާގެ ޑެޕިއުޓީ އިންސްޕެކްޓާ ޖެނެރަލް އޮފް ޕޮލިސް އަޖިތު ރޯހަނާ ވިދާޅުވީ މިދިޔަ އަހަރު އެގައުމަށް ދިން ޓެރަރިސްޓު ހަމަލާގެ ތަހުގީގަށް 153 މީހަކު ހައްޔަރުކޮށްފައިވާ ކަމަށާއި އޭގެތެރޭގައި ލަންކާ އަށް ނިސްބަތްނުވާ ހަތަރު މީހަކުވެސް ހިމެނޭ ކަމަށެވެ. އެގޮތުން އެ ހަތަރު މީހުން ނިސްބަތްވަނީ ރާއްޖެ އަށް ކަމަށް އޭނާ ވިދާޅުވިއެވެ. ނަމަވެސް އެ މީހުންނާ ގުޅޭ އިތުރު ތަފްސީލެއް ހާމަކޮށްފައެއް ނުވެއެވެ.