ކުރިއަށް އޮތް ލޯކަލް ކައުންސިލް އިންތިޚާބުގައި ހިތަދޫ ބޭރުމަތި ދާއިރާއަށް ކުރިމަތިލާނެ އިތުރު ކެންޑިޑޭޓެއް ނެތުމުން އެމްޑީޕީން ކުރިމަތިލި މަރިޔަމް ސައީދާ(މަރީ) އަށް ގޮނޑި ކަށަވަރުވެއްޖެއެވެ.
އިންތިޚާބަށް ކުރިމަތިލުމަށް އީސީން ހުޅުވާލި މުއްދަތު ހަމަވީއިރު މަރީ ފިޔަވައި އިތުރު އެއްވެސް ކެންޑިޑޭޓަކު އެދާއިރާއަށް ކުރިމަތިލާން ފޯމު ހުށައަޅާފައެއް ނުވެއެވެ.
ބޭރުމަތި ދާއިރާ އަކީ އަންހެނުންނަށް ޚާއްސަ ކުރެވިފައިވާ އެއް ދާއިރާއެވެ. ނ. އަތޮޅު ކުޑަފަރީ ތިން ދާއިރާއަކަށް ވެސް ވަނީ އިތުރު ކެންޑިޑޭޓަކު ކުރިމަތިނުލާތީ ގޮނޑި ކަށަވަރު ވެފައި ކަން އީސީން ވަނީ ހާމަކޮށްފައެވެ. އެ ގޮނޑިތައް ވެސް ކަށަވަރުވީ އެމްޑީޕީ ކެންޑިޑޭޓުންނަށެވެ.
އެމްޑީޕީން ހުރިހާ ދާއިރާއަކަށް ކެންޑިޑޭޓުން މި އިންތިޚާބުގައި ވެސް ނެރުމަށް ހަމަޖެހިފައިވާއިރު ދެން އެންމެ ގިނަ ކެންޑިޑޭޓުން ވާދަކުރަނީ އިދިކޮޅު ޕީޕީއެމުންނެވެ. ކާށިދޫ ދާއިރާގެ މެމްބަރު އަބްދުﷲ ޖާބިރުގެ ޑީއާރުޕީ އިން ވެސް ވަނީ ހުރިހާ ދާއިރާއަކަށް ކެންޑިޑޭޓުން ނެރޭނެ ކަމަށް އިއުލާންކޮށްފައެވެ.