ކުރީގެ ދެ ރައީސުން ކަމަށްވާ ރައީސް މައުމޫން އަދި ރައީސް ނަޝީދުގެ ދަރިކަނބަލުންގެ މެދުގައި ބަހުގެ ހަމަލާތަކެއް ރައްދުކޮށްފިއެވެ.
ޓުވީޓާގައި ރައީސް މައުމޫންގެ ދަރިކަނބަލުން ދުންޔާ މައުމޫން ކުރެއްވި ޓުވީޓަކާ ގުޅިގެން މަސްލަހަތު ހޫނުވެެފައިވާއިރު ނަޝީދު ވަނީ މައުމޫންގެ އާއިލާއިން އެމަނިކުފާނުގެ ދަރިން އެއްކާރިކޮށްލުމަށް އެދިވަޑައިގެންފައެވެ.
ދުވަސްވީ ސިޔާސީ ދެހަތުރުން ކަމަށްވާ މައުމޫނާއި ނަޝީދު އެއްގަލަކަށް އަރާވަޑައިގެންނެވީ ކުރީގެ ރައީސް ޔާމީންގެ ވެރިކަން ނިމުމަކަށް ގެނައުމަށެވެ. ދެ ރައީސުން އޭގެ ފަހުން އެކުގާ މަސައްކަތް ކުރައްވާފައިވާއިރު މިވެރިކަމުގައި ވެސް ދެ ރައީސުން ތިއްބެވީ ފެންނަ ފެނުމުން އެކުވެރިކޮށެވެ.
ނަމަވެސް މައްސަލަ ހޫނުވެގެން ދިޔައީ ދުންޔާ ކުރެއްވި ޓުވީޓެއްގައި ނަޝީދަށް ފާޑުވިދާޅުވެ، މައުމޫނަށް އަނިޔާކުރެއްވި ކަމަށް ތުހުމަތު ކުރުމުންނެވެ. އެގޮތުން ނަޝީދުގެ ވެރިކަމުގައި ވެސް ރައީސް މައުމޫނަށް ދަތި އުނދަގޫތަކެއް ކުރިމަތިވި ކަމަށާއި އެކަން ހަނދާނުގައި އެބަ ހުރި ކަމަށް އޭނާ ވިދާޅުވިއެވެ.
ދުންޔާއަށް ރައްދު ދެމުން ނަޝީދުގެ ދަރިކަނބަލުން މީރާ ވަނީ މައުމޫންގެ ވެރިކަމުގައި ކުރި އަނިޔާތަކުގެ ވާހަކަ ދައްކައި ހޫނު ރައްދުތަކެއް ފޮނުވާފައެވެ.
އެންމެ ފަހުން ރައީސް ނަޝީދު ވެސް މިމައްސަލައިގެ ތެރެއަށް ވަންނަވައި، މައުމޫންގެ ވެރިކަމުގައި އެތައް ދުވަހެއް ވަންދެން ރައްޔިތުންނަށް އަނިޔާ ކުރެއްވި ކަމަށާއި އެމަނިކުފާނުގެ އާއިލާއިން މިހާރު އެވާހަކަތައް ނުދައްކެވުން ވާނީ ރަނގަޅު ކަމަކަށް ކަމަށް ވިދާޅުވިއެވެ. އަދި އެމަނިކުފާނުގެ ދަރިންނަށް އިތުރު ތަކުލީފުތަކެއް ނުޖެއްސުމަށް އެދިވަޑައިގެނފައިވެއެވެ.
މިކަމާ ގުޅޭގޮތުން ރައީސް މައުމޫން އަދި އެމަނިކުފާނުގެ ޕާޓީ އެމްއާރްއެމް އިން ވަކި އެއްޗެއް ބުނެފައެއް ނުވެއެވެ.