އައްޑޫ ސިޓީ ކައުންސިލްގެ މުވައްޒަފަކު މަޤާމުގެ ނުފޫޒު ބޭނުންކޮށްގެން އޭނާގެ މަސްލަހަތު އޮތް މީހަކަށް ބިމެއް މިލްކު ކޮށްދޭން މަސައްކަތް ކުރަމުންދާ ކަމުގެ މައްސަލަ އެންޓި ކޮރަޕްޝަން ކޮމިޝަން (އޭސީސީ)އަށް ހުށައަޅައިފިއެވެ.
އެގޮތުން އާންމު ފަރާތަކުން ހުށައަޅާފައިވާ މި މައްސަލައަކީ އެ މުވައްޒަފު މަޤާމުގެ ނުފޫޒު ބޭނުންކޮށްގެން، އިދާރާގައި ވާ ލިޔެކިޔުންތައް ނަގައި، ނައްތާލުމަށްފަހު، މިނިސްޓްރީއަށް ސައްޙަނޫން މައުލޫމާތު ފޮނުވައިގެން އޭނާގެ މަންމައަށް މީހެއްގެ ބިން މިލްކުކޮށްދިނުމަށް އޭނާ ކޮށްފައިވާ މަސައްކަތް ބަލައި ތަޙްޤީޤުކުރުމަށް ހުށަހަޅާފައިވާ މައްސަލައެއްކަން "އައްޑޫލައިވް" އަށްވަނީ ކަށަވަރުކުރެވިފައެވެ.
"އައްޑޫލައިވް" އަށް މަޢުލޫމާތު ލިބިފައިވާ ގޮތުގައި، މިކަން ކުރުމަށް މަސައްކަތްކޮށްފައިވަނީ ފާއިތުވި ވެރިކަމުގައި ހައުސިންގް މިނިސްޓްރީގެ ގޮތްޕެއް އައްޑޫ ސިޓީގައި ޤާއިމުވެފައިވަނިކޮށް، އޭރު އެތަނުގައި އޭނާ މަސައްކަތް ކުރުމުގެ ތެރޭގައެވެ.
އެގޮތުން، އޭނާ ވަނީ އޭނާގެ މަންމައަށް ހިތަދޫ މެދުވަލު ސަރަހައްދުން، ހިބައިން ލިބިފައިވާ 4900 އަކަފޫޓުގެ ބިމުގެ އިތުރަށް، އެބިމާއި އިންވެގެން އިރަށް އޮންނަ 4700 އަކަފޫޓުގެ ބިމަކީވެސް އޭނާގެ މަންމަގެ ބިންކަމުގައި ކަނޑައެޅުމަށް މަންމަގެ ފަރާތުން ކޯޓަށް މައްސަލަ ހުށައަޅާފައެވެ.
ނަމަވެސް "އައްޑޫލައިވް"އަށް ލިބިފައިވާ ލިޔެކިޔުންތަކާއި ޗާޓުތަކުން ފެންނަ ގޮތުގައި މި ދެ ގޯއްޗަކީވެސް ވަކި ދެ ގޯތީގެ ގޮތުގައިވަނީ ކަނޑައެޅިފައެވެ. އަދި ޗާޓުތަކުގައިވެސް 4700 އަކަފޫޓުގެ ބިމާއި ދިމާލުން އޮންނަނީ އެބިމުގެ ވެރިޔާގެ ނަމެވެ. އަދި އޭނާގެ މަންމަ އަށް ހިބައިން ބިން ލިބިމުގެ ކުރިން ވެސް އަދި ފަހުން ވެސް އެގޭގެ އިރުން އޮތް 4700 އަކަފޫޓުގެ ބިމަކީ 4900 އަކަފޫޓުގެ ގޯތީގެ ތެރޭގައިވާ ބިމެއް ނޫނެވެ.
މި މައްސަލަ ފާއިތުވި ސަރުކާރުގެ ދުވަސްވަރުން ފެށިގެން ސ. ހިތަދޫ މެޖިސްޓްރޭޓް ކޯޓުން ބަލަމުން އަންނަ އިރު، އައްޑޫ ސިޓީ ކައުންސިލުންވެސް ދަނީ މިކަން ތަހުޤީޤު ކުރަމުންނެވެ. މިކަމާ ގުޅޭ އިތުރު މައުލޫމާތު ހޯދުމަށް "އައްޑޫލައިވް" އިން ވަނީ އައްޑޫ ސިޓީ ކައުންސިލަށް މަޢުލޫމާތު ހޯދާ ލިބިގަތުމުގެ ޤާނޫނުގެ ދަށުން ފޯމެއް ހުށައަޅަން ނިންމާފައެވެ.