ކުރީގެ ބަންޑާރަ ނައިބް ޑރ. މުހައްމަދު މުނައްވަރު ހިތުގެ ބައިޕާސް އޮޕަރޭޝަނަށްފަހު ހާލު ރަނގަޅުވަމުން އަންނަ ކަމަށް އާއިލާއިން ބުނެފިއެވެ.
ޑރ. މުނައްވަރުގެ އާއިލާއިން މިގޮތަށް ބުނެފައިވަނީ އެމަނިކުފާން ލަންކާގެ ހޮސްޕިޓަލެއްގެ އައިސީޔޫގައި ފަރުވާދެމުންދާކަމަށް ބުނެ ބައެއް މީޑިއާ ތަކުގައި ގެނެސްދީފައިވާ ހަބަރާއި ގުޅިގެން ގިނަ ބަޔަކު ކަންބޮޑުވުން ފާޅު ކުރަމުންދަނިކޮށެވެ.
ޑރ. މުނައްވަރުގެ ދަރިފުޅު ރާއި މުނައްވަރު މިރޭ ވިދާޅުވީ ބައިޕާސް އޮޕަރޭޝަނަށް ފަހު ބައްޕަގެ ހާލު ރަނގަޅުވަމުން އަންނަ ކަމަށެވެ.
"ބައްޕަ މިކޮޅުން (ލަންކާއިން) ޑޮކްޓަރަށް ދެއްކުމުން ހިތުގެ މައްސަލައެއް ހުރުމުން އެންޖިއޮގްރާމް ހެދުމަށްފަހު ބައްޕަ އަމިއްލައަށް ބޭނުންވީ ބައިޕާސް އޮޕަރޭޝަނަކަށްދާން، އަނެއްހެން އިމަޖެންސީގައި ގެނެސް އައިސީޔޫގައި ފަރުވާ ދެނީއެއް ނޫން، އޮޕަރޭޝަނަށް ފަހު ސްޓޭބްލް ވަންދެން އައިސީޔޫގައި ބޭއްވީ، މިހާރު އިރާދަކުރެއްވިއްޔާ ރަނގަޅުވަމުން އަންނަނީ، ޑޮކްޓަރުންވެސް ވިދާޅުވަނީ ރަނގަޅުވަމުން އަންނަ ކަމަށް"
ރާއި ވިދާޅުވިއެވެ
ޑރ. މުނައްވަރަކީ ރާއްޖޭގެ އެންމެ ބޮޑު ސިޔާސީ ޕާޓީ އެމްޑީޕީ އުފެއްދުމުގައި އިސް ދައުރެއް އަދާކުރެއްވި ބޭފުޅެކެވެ. މުނައްވަރު ވަނީ ޖޫން 2007 އިން 13 އޮގަސްޓު 2008 އާއި ހަމައަށް އެމްޑީޕީގެ ރައީސްކަމުގެ މަގާމު އަދާ ކުރައްވާފައެވެ.
ރައީސް މައުމޫންގެ ވެރިކަމުގައި ރާއްޖޭގެ ބަންޑާރަ ނައިބްކަން ޑރ. މުނައްވަރު ވަނީ 10 އަހަރުވަންދެން ކުރައްވާފައެވެ. އަދި 2003 ވަނަ އަހަރު ސަރުކާރު ދޫކުރައްވައި އިދިކޮޅު ފަރާތްތަކާއި ގުޅިވަޑައިގެންނެވިއެވެ. މައުމޫންގެ ވެރިކަމުގައި 2004 ވަނަ އަހަރު އޮގަސްޓު 12،13 ގައި މުނައްވަރު ހައްޔަރުކޮށް ދައުލަތާއި އިދިކޮޅު ހަރަކާތް ހިންގި ކަމުގެ ދައުވާ އުފުލައި ހައްުޔަރުކުރިއެވެ.