އިންޑިޔާގައި ފާސްކުރަން އުޅޭ ސިޓިޒަންޝިޕް ގާނޫނާ ގުޅިގެން އުފެދިފައިވާ ނުތަނަވަސްކަން އިތުރުވެ، މުސްލިމުންނާއި ހިންދޫންގެ ދެމެދުގައި ހިނގި ކުރިމަތިލުންތަކެއްގައި 13 މީހަކު މަރުވެއްޖެއެވެ.
ދިއްލީ ފުލުހުން ބުނީ މިއީ ފަހުގެ ތާރީޚެއްގައި ވެސް އިންޑިޔާގައި ނުހިނގާ ފަދަ ނުރައްކާތެރި ހަމަނުޖެހުންތަކެއް ކަމަށެވެ.
އެމެރިކާގެ ރައީސް ޑޮނަލްޑް ޓްރަމްޕް ވެސް މިހާރު އިންޑިޔާއަށް ރަސްމީ ދަތުރުފުޅެއްގައި ވަޑައިގެންފައިވާއިރު އިންޑިޔާ ފުލުހުން ވަނީ ހަމަނުޖެހުން ކޮންޓްރޯލް ކުރުމަށް މަސައްކަތް ކޮށްފައެވެ.
ނަމަވެސް ހަމަނުޖެހުންތައް ކޮންޓްރޯލް ނުވެ މުސްލިމުންނާއި ހިންދޫންނާ ދެމެދު ގްރޫޕް މާރާމާރީތައް ވަނީ ދިއްލީގައި އިތުރުވެފައެވެ. ރޭގެ ހަމަލާތަކުގައި މަރުވެފައިވަނީ ކިތައް މުސްލިމުން ކަމެއް ނުވަތަ ހިންދޫން ކަމެއް އިދާރާތަކުން ހާމަކޮށްފައެއް ނުވެއެވެ.
ރަށްވެހި ކަމުގެ އާ ގާނޫނެއް ހަދަން މަސައްކަތް ކުރަމުން އަންނައިރު އެއީ މުސްލިމުންގެ ހައްގުތައް ނިގުޅައިގަނެ އަޅުވެތި ކުރުމަށް ބާރު ލިބޭ ގާނޫނެއް ކަމަށް ބުނެ އެތައް މިލިއަން މުސްލިމުންނެއް ދަނީ އަޑު އުފުލައި އިހުތިޖާޖު ކުރަމުންނެވެ.